Alopecia: Përshkrimi, shkaqet dhe trajtimi

Thuajse gjithmonë alopecia është një gjendje tranzitore e rikthyeshme dhe mund të dallohen disa forma të ndryshme të saj:
• Alopecia androgjenike jo-cikatriciale - Konsiderohet si patologji e trashëgueshme dhe ka një kurs kronik. Ajo është shumë e zakonshme te burrat, por është vërejtur edhe te femrat. Humbja e flokëve fillon në zonat frontale-parietale dhe në majën e kokës e pastaj përhapet në të gjitha zonat;
• Alopecia cikatriciale - Konsiston në humbjen e flokëve si rezultat i traumave, inflamacionit apo infeksionit të indeve. Mund të shoqërohet me ''planus lichen'', ''lupus eritematoz'', djegie, ulçera, granuloma, sifiliz apo të tjera;
• Alopecia areata - Është humbja e papritur e flokëve. Ajo mund të jetë e lokalizuar ose e plotë. Karakterizohet më shpesh nga formimi i njollave pa flokë, të buta, të rrumbullakosura dhe të madhësive ndryshme. Format më të përhapura shfaqen para adoleshencës, më të lehtat mund të zhduken në mënyrë spontane në pak javë, por në raste të tjera alopecia vazhdon në periudha më të gjata;
• Alopecia toksike - Mund të shkaktohet nga marrja e kimioterapisë, nga doza të larta të retinoidit, nga miksedema, shtatzënia dhe periudha pas lindjes.

Shkaqet
Alopecia mund të jetë pasojë e shkaqeve gjenetike ose të fituara. Në alopecinë areata një nga arsyet më të besueshme janë ndryshimet në sistemin imunitar. Gjendja e skalpit të kokës dhe e flokëve pasqyron gjendjen shëndetësore të organizmit, kështu që nuk është e lehtë të identifikohet një arsye e vetme që e shkakton. Në origjinën e formave të rikthyeshme mund të jenë faktorë të tillë si sëmundjet sistemike, episodet e stresit emocional, mungesat hormonale apo vitaminoze, barnat, shtatzënia, mosha e vjetër.

Diagnoza
Me një vizitë dermatologjike është e mundur të dallohen format infektive nga ato kronike. Është e këshillueshme që të vazhdohet me një dermoskopi të skalpit të kokës në kërkim të anomalive të mundshme apo lezioneve të lëkurës. Ekzaminimi shërben për të dalluar flokët në fazën e rritjes (anagen) nga ato që janë në fazë pushimi (telogen). Në alopecitë që rezultojnë nga sëmundje sistemike ose të pas-lindjes rritet përqindja e fijeve të flokut në fazën telogen. Me anë të analizave të gjakut mund të diagnostikohet prania e njëkohshme edhe e një sëmundje autoimune.

Pasojat
Humbja e flokeve, qoftë edhe e përkohshme, ka një ndikim shumë negativ në cilësinë e jetës dhe në vetë-vlerësim. Alopecia, pavarësisht nga të pasurit e një dekursi beninj, mund të shkaktojë ndjenjën e zemërimit, refuzimit, turpit, ankthit dhe depresionit, sidomos te gratë.

Trajtimi
Nuk ka asnjë trajtim të veçantë për alopecinë areata dhe rishfaqjen e saj. Për të bllokuar procesin inflamator përdoren kortikosteroidët, imunomodulatorët për përdorim lokal dhe fotokimioterapia. Në nivel sistemik përdoret terapi me imunosupresor apo medikamente (JAK inhibitor) eksperimentale për të ndaluar sulmin imunitar ndaj folikujve të flokut. Gjithashtu rekomandohet mbështetja psikologjike.

Pyetjet esenciale
• Prej sa kohësh keni vënë re se po humbni flokët në sasi të mëdha?
• Keni humbje qimesh nga pjesë të tjera të trupit?
• Keni pasur kohët e fundit stres të madh emocional?