shk82022
HIV. FDA-ja miraton administrimin e ri për trajtimin antiviral
Administrata e Ushqimit dhe e Barnave (FDA) në Amerikë, ka miratuar kombinimin e rilpivirinës dhe kabotegravirit me administrim çdo 2 muaj, për të rriturit që jetojnë me infeksion HIV.
Janssen dhe ViiV Healthcare e zhvilluan së bashku medikamentin antiretroviral të injektueshëm Cabenuva. Kombinimi farmakologjik u miratua për herë të parë nga FDA-ja në janar 2021, për t'u administruar një herë në muaj për trajtimin e infeksionit HIV-1 te të rriturit e supresuar virologjikisht. Bari ishte i pari regjim i plotë antiretroviral i injektueshëm, i miratuar nga FDA-ja.
Cabenuva mund të zëvendësojë trajtimin aktual te të rriturit e supresuar virologjikisht, me një regjim të qëndrueshëm antiretroviral dhe asnjë rezistencë të njohur ose të dyshuar ndaj rilpivirinës dhe kabotegravirit, tha në një njoftim për shtyp kompania farmaceutike Janssen e Johnson & Johnson.
Miratimi i kësaj doze të re në etiketë "shënon një hap të rëndësishëm përpara në avancimin e panoramës terapeutike për njerëzit që jetojnë me HIV", tha Candice Long, presidente e sëmundjeve infektive dhe vaksinave në Janssen Therapeutics, e cila përfundon: "Me këtë moment historik, të rriturit që jetojnë me HIV kanë një opsion trajtimi që redukton më tej frekuencën e barnave".
Ky indikacion u bazua në një studim klinik global te 1045 të rritur me HIV-1, i cili zbuloi se Cabenuva e administruar çdo 8 javë (dozë 3 ml, si e kabotegravirit, ashtu edhe e rilpivirinës) nuk është inferiore ndaj regjimit 4-javor (dozë prej 2 ml e të dyja barnave). Në javën e 48-të të studimit, përqindja e pjesëmarrësve me ngarkesë virale më të madhe se 50 kopje për mililitër, ishte 1.7% në grupin me injektime çdo 2 muaj dhe 1.0% në subjektet e trajtuara mujore. Studimi zbuloi gjithashtu se shkalla e supresionit virologjik ishte e ngjashme për të dyja regjimet, 1-mujore dhe 2-mujore (93.5% dhe 94.3%, respektivisht).
Efektet anësore më të zakonshme intramuskulare të barit ishin reaksionet në vendin e injektimit, pireksia, lodhja, dhimbja e kokës, dhimbja muskulo-skeletore, të vjellat, çrregullimet e gjumit, marramendja dhe skuqja e lëkurës. Reagimet anësore të raportuara tek individët që merrnin regjimin çdo 2 muaj ose një herë në muaj, ishin të ngjashme.