jan292015

EMA pro miratimit të një antibiotiku të ri

Komiteti i Barnave për Përdorim Njerëzor (CHMP) i Agjencisë Evropiane të Barnave (EMA) është shprehur në favor të terapisë antibiotike me fosfat tedizolid për trajtimin e infeksioneve akute të lëkurës te pacientët e rritur. Produkti është zhvilluar nga "Cubist Pharmaceuticals" së  fundi i blerë nga MSD.
Fosfati tedizolid pritet të miratohet për trajtimin e të rriturve me infeksione bakteriale akute të lëkurës, të shkaktuara nga disa baktere të caktuara, mes të cilave Staphylococcus aureus, shtamet rezistente ndaj meticilinës (MRSA) dhe shtamet e ndjeshme ndaj meticilinës, përveç llojeve të ndryshme të Streptococcus e Enterococcus faecalis. Fosfati tedizolid do të vihet në dispozicion për përdorim intravenoz dhe oral.
Është fjala për një oksazolidinon të gjeneratës së dytë dhe i takon një grupi antibiotikësh, mekanizmi i veprimit i të cilëve mbështetet në bllokun e sintezës proteinike me një aktivitet bakteriostatik drejt pjesës më të madhe të patogjeneve për njerëzit.
Në SHBA, antibiotiku i ri është miratuar gjashtë muaj më parë nga Administrata e Barnave dhe Ushqimit, në bazë të rezultateve të dy studimeve që e krahasuan atë me linezolidin. Në të dyja rastet, fosfati tedizolid u tregua jo më pak inferior se bari i kontrollit. Në një rast, norma e përgjigjes klinike ishte 79,5% (në krahasim me 79,4% të linezolidit), në tjetrin dallimi i raportuar ishte pak më i lartë dhe i favorshëm se bari i ri: 85% në krahasim me 82, 6%.
Edhe incidenca e efekteve anësore rezultoi mjaft e ngjashme: 42,7% për tedizolid dhe 43,2% për linezolid, ndërsa ato të rëndat ishin përkatësisht 1.8% dhe 2%. Për të dyja barnat, efektet anësore të raportuara më shpesh ishin ndjesitë e përzierjes, diarrea dhe të vjellat.