tet62015
Barna të reja në kardiologji dhe onkologji
Gjatë katër ditëve të fundit EMA (European medicine agency) ka rekomanduar aprovimin e disa barnave të reja: sacubitril/valsartan për trajtimin e insuficiencës kardiake, alirocumab për hiperkolesteroleminë dhe carfilzomib, principi aktiv i të cilit indikohet në planet terapeutike për mielomën e shumëfishtë. Në Shtetet e Bashkuara, FDA ka aprovuar kombinimin mes trifluridinës dhe tipiracilit, për administrim te pacientët me kancer kolorektal në fazë të avancuar.
Në rastin e sacubitril/valsartan (Entresto), EMA e rekomandon barin për trajtimin e pacientëve të rritur me insuficiencë kardiake simptomatike. Risia kryesore qëndron te sacubitril, molekulë që i përket një kategorie të re barnash të quajtur inhibitorë të neprisilinës. Kjo e fundit i përket familjes së endopeptidazeve. Efikasiteti i barit është vlerësuar nëpërmjet një studimi që zgjati 27 muaj dhe përfshiu 8.000 pacientë të cilët e toleruan mirë terapinë. Në periudhën e studimit vdekshmëria specifike u ul nga 16.5% në 13.3%.
Po ashtu, Komisioni Evropian ka autorizuar emetimin në treg të alirocumab (Praluent), një bar i injektueshëm i përdorur në kontrollin e hiperkolesterolemisë Ldl. Produkti ka treguar se është klinikisht i vlefshëm dhe me një profil sigurie të pranueshëm, duke u mbështetur në 10 studime klinike të fazës III, gjysma e të cilave ka përdorur si kontroll një placebo dhe gjysma tjetër ezetimibe. Studimet kanë regjistruar një rënie të kolesterolit Ldl te pacientët që kanë marrë alirocumab në krahasim me ata që janë futur në grupin e kontrollit.
Agjencia Evropiane ka rekomanduar aprovimin e carfilzomib (Kyprolis) për trajtimin e mielomës së shumëfishtë. Bari i përket kategorisë së inhibitorëve të proteasomëve dhe ka dëshmuar sigurinë dhe efikasitetin e tij në 792 pacientë që kanë marrë pjesë në një studim të fazës III. Te këta, zhdukja e simptomave kishte një kohëzgjatje më të madhe, mesatarisht, 8.7 muaj më shumë krahasuar me terapinë me lenalidomide dhe deksametazon, duke kaluar nga 17.6 muaj në 26.3.
Në Shtetet e Bashkuara, FDA ka dhënë dritën jeshile ndaj një bari për administrim oral i destinuar për pacientët me kancer kolorektal në stad të avancuar që nuk i janë përgjigjur terapive të tjera. Bari përmban një kombinim të trifluridinës dhe tipiracilit (Lonsurf). Një studim i 800 pacientëve ka regjistruar një mbijetesë prej 7.1 muajsh më shumë krahasuar me subjektet që kanë marrë placebon. Efektet anësore të tij përfshijnë mes të tjerash: aneminë, neutropeninë, trombocitopeninë, asteninë, diarrenë, të vjellat dhe temperaturë.