jan162018
Të mos përdoren më te fëmijët barnat e kollës që përmbajnë kodeinë
Administrata e Ushqimit dhe e Barnave (FDA) ka njoftuar se duhet bërë rishikimi i rreptë i etiketave të barnave të përshkruara për kollë dhe të ftohtë, që përmbajnë opioide, të tilla si kodeina ose hidrokodoni. Këto etiketa duhet të tregojnë qartë se nuk mund të përdoren më për trajtimin e fëmijëve, sepse janë më të mëdha rreziqet sesa përfitimet prej tyre. Përdorimi do të jetë i kufizuar vetëm për të rriturit me moshë 18 vjeç e lart, saktëson deklarata, por etiketimi do të përditësohet me informacione shtesë mbi sigurinë për përdorimin te të rriturit, përfshirë një kuadrat të zi (niveli më i rëndësishëm i paralajmërimit të FDA-së), i cili thekson rrezikun e keqpërdorimit, abuzimit, varësisë, mbidozimit dhe vdekjes, si dhe problemeve me frymëmarrjen që mund të rezultojnë nga ekspozimi ndaj kodeinës ose hidrokodonit.
Etiketa e re do të përmbajë paralajmërime sigurie në përputhje me etiketat e barnave të tjera që përmbajnë opioide, përfshirë analgjezikët opioidë. Qëllimi i FDA-së është ndërhyrja në "epideminë" e varësisë ndaj opioideve, siç përcaktohet nga përfaqësuesi i saj, Scott Gottlieb:
"Jemi të shqetësuar në lidhje me ekspozimin ndaj opioideve, kur nuk është e nevojshme, sidomos te fëmijët e vegjël. Ne e dimë se çdo ekspozim ndaj barnave opioide mund të çojë në një varësi të ardhshme. Është bërë e qartë se përdorimi i këtyre barnave me recetë për trajtimin e kollës dhe të ftohtit te fëmijët mbart rreziqe serioze që nuk e justifikojnë përdorimin e tyre në këtë popullatë të ndjeshme. Është e domosdoshme të mbrohen fëmijët nga ekspozimi i panevojshëm ndaj barnave me recetë që përmbajnë kodeinë ose hidrokodon. Në të njëjtën kohë, po ndërmarrim masa të tjera për të bindur prindërit se trajtimi i kollës dhe i të ftohtit është i mundur pa përdorimin e produkteve që përmbajnë opioide".
Ndryshimet e kërkuara bazohen në një rishikim të gjerë të të dhënave në dispozicion. Që në vitin 2013, FDA-ja kishte bërë paralajmërimin e parë publik mbi përdorimin e kodeinës për gjendjet shëndetësore të heqjes së tonsileve apo adenoideve. Në vitin 2015, u njoftua për një hetim mbi rreziqet e mundshme që lidhen me përdorimin e kësaj substance për trajtimin e kollës dhe të ftohtit te pacientët nën 18 vjeç. Vitin e kaluar u kërkuan etiketime më të forta për të kufizuar përdorimin për pacientët nën 12 vjeç dhe për nënat që ushqejnë fëmijët me gji. Ky është veprimi i fundit i FDA-së për të forcuar më tej paralajmërimet.
Efektet anësore të opioideve, kujton FDA-ja, përfshijnë përgjumje, marramendje, të vjella, të përziera, kapsllëk, probleme me frymëmarrjen dhe dhimbje koke.