qer12018

Kladribina shfaq efikasitetin te pacientët me sklerozë të shumëfishtë recidivuese

Artikuj lidhur

01-08-2023 | OBSH-ja përditëson listën e barnave esenciale

19-03-2021 | Skleroza e shumëfishtë. Nabiximolsi, efektiv në përmirësimin e ekuilibrit dhe të ecjes

28-12-2020 | Skleroza e shumëfishtë. Siponimodi ngadalëson përparimin e aftësisë së kufizuar dhe përmirëson përpunimin konjitiv

Rezultatet e një analize post-hoc të studimit CLARITY, kanë konfirmuar efikasitetin klinik dhe radiologjik të kladribinës në dy nëngrupe pacientësh të studimit me sklerozë të shumëfishtë (SM) recidivuese, me aktivitet të shtuar të sëmundjes. "Të dhënat e efikasitetit tregojnë një reduktim edhe më të madh të rrezikut mbi përparimin e paaftësisë, të matur nëpërmjet shkallës EDSS, me kladribinë në formë tabletash te pacientët me SM në aktivitet të shtuar të sëmundjes", thotë Gavin Giovannoni, Universiteti "Mbretëresha Mari" i Londrës, që ka udhëhequr punimin. Pacientët e studimit CLARITY me aktivitet të shtuar të sëmundjes, janë klasifikuar në dy grupe.

Grupi i parë përfshinte pacientë me SM recidivuese me aktivitet të shtuar të sëmundjes  (HRA), domethënë pacientë me të paktën dy përsëritje gjatë vitit të mëparshëm, në trajtim modifikues për sëmundjen (DMD) ose që nuk kanë qenë në trajtim.

Grupi i dytë përfshinte pacientë me SM recidivuese me aktivitet të shtuar të sëmundjes dhe pacientë me aktivitet të sëmundjes gjatë trajtimit (HRA+DAT), domethënë, pacientë me të paktën një përsëritje dhe të paktën një lezion T1 shtues të gadoliniumit, ose të paktën nëntë lezione T2 gjatë vitit të mëparshëm, në trajtim me barna të tjera modifikuese të sëmundjes dhe pacientë me të paktën dy përkeqësime në vitin e mëparshëm, në trajtim me DMD.

Te pacientët e klasifikuar si HRA dhe HRA+DAT janë vënë re përgjigje më të mira ose të krahasueshme me rezultatet e vëzhguara në popullsinë e përgjithshme të studimit CLARITY, me një reduktim prej 82% të rrezikut të përparimit të paaftësisë në gjashtë muaj, krahasuar me një reduktim prej 47% në popullsinë e përgjithshme të studimit bazë.

Gjithashtu, analiza ka treguar se në nëngrupin HRA+DAT, trajtimi është lidhur me një mundësi më të madhe për të arritur stadin e mungesës së sëmundjes, krahasuar me nëngrupin jo HRA+DAT. Përsa i përket analizës së sigurisë, në nëngrupet specifike të marra parasysh, nuk janë vënë re dallime krahasuar me atë që është vënë re në popullsinë në përgjithësi.

Mult Scler. 2018. doi: 10.1177/1352458518771875
https://www.ncbi.nlm.nih.gov/pubmed/29716436