qer222021
Dhimbja. Antiinflamatorët josteroidë (FANS) përballë kodeinës. Pluset dhe minuset
Barnat antiinflamatore josteroide (NSAID/FANS) ofrojnë kontroll më të mirë të dhimbjes dhe kanë më pak efekte anësore se kodeina kur përshkruhen pas ndërhyrjes kirurgjikale ambulatore, sipas studimit të ri të botuar në "CMAJ". "Në të gjitha llojet e operacioneve, nëngrupeve dhe kohës së vlerësimit të rezultateve, FANS-at ishin të barabartë ose superiorë ndaj kodeinës për menaxhimin e dhimbjes pas operacionit", tha Matthew Choi (Universiteti McMaster), autori i parë i studimit.
Studiuesit kryen një rishikim sistematik dhe metaanalizë të 40 studimeve të kontrolluara, me përzgjedhje rastësore me cilësi të lartë që përfshinë më shumë se 5,100 të rritur, për të krahasuar efektin që kanë mbi dhimbjen dhe sigurinë e barnave që përmbajnë kodeinë dhe të FANS-ave. Ekspertët vunë në dukje se pacientët që merrnin FANS-a kishin rezultate më të ulëta sa i përket dhimbjes 6 dhe 12 orë pas trajtimit sesa pacientët që merrnin kodeinë. "Ne zbuluam se pacientët e përzgjedhur në mënyrë të rastësishme për të marrë FANS-a pas një procedure kirurgjikale ambulatore, raportuan rezultate më të mira të dhimbjes dhe të vlerësimit të përgjithshëm, më pak efekte anësore dhe asnjë ndryshim në ngjarjet hemorragjike, krahasuar me ata që morën kodeinë", vazhdon Choi.
Kodeina përdoret gjerësisht për menaxhimin e dhimbjes pas operacionit dhe është opioidi më i përshkruar në Kanada. Për fat të keq, megjithatë, dihet se ajo shoqërohet me një sërë efektesh anësore dhe ka potencialin për abuzim ose varësi. Alternativa të tilla si ato FANS, mund të ndihmojnë reduktimin e përdorimit të opioidit te pacientët pas procedurave dentare dhe kirurgjikale. "Këto zbulime janë të një rëndësie të përgjithshme për çdo mjek që kryen procedura të dhimbshme. Studimet e ndryshme në meta-analizën tonë kanë vlerësuar një gamë të gjerë procedurash, lloje të ndryshme të FANS-ave dhe shkallë të ndryshme të administrimit të acetaminofenit", thotë Choi. Autorët konkludojnë se gjetjet e tyre përforcojnë provat ekzistuese dhe janë gjerësisht të përgjithësueshme për pacientët e të gjitha disiplinave kirurgjikale.
CMAJ 2021. Doi: 10.1503/cmaj.201915
http://doi.org/10.1503/cmaj.201915