Polipilula, në parandalimin kardiovaskular. Një panel vlerëson kostot dhe përfitimet e saj

A gjen hapësirë polipilula në parandalimin kardiovaskular? Sipas një paneli italian, ky lloj medikamenti është efektiv në reduktimin e ngjarjeve kardiovaskulare, presionit të gjakut dhe lipideve, rrezikut kardiovaskular dhe barrës së terapisë dhe në përmirësimin e respektimit të terapisë. Përfundimet e grupit të punës raportohen në një studim të botuar në "Journal of Cardiovascular Medicine", të udhëhequr nga Pasquale Perrone-Filardi (Universiteti Federico II, Napoli).

Studiuesit u përpoqën të arrinin një konsensus mbi vlerën e polipilulës, pra, mbi formulimet që kombinojnë në një pilulë të vetme principet aktive që veprojnë në objektiva të ndryshëm terapeutikë, siç janë dy barna antihipertensive me mekanizma të ndryshëm veprimi, ose një antihipertensiv dhe një antilipidik, në sëmundjet kardiovaskulare. Për të vendosur konsensusin, u përdor një metodë e modifikuar Delphi me tre hapa. Në grup morën pjesë njëmbëdhjetë ekspertë në fushën e kardiologjisë, teknologjisë farmaceutike, mjekësisë së përgjithshme, farmacisë spitalore, farmakologjisë dhe ekonomisë shëndetësore. Për të identifikuar provat ekzistuese në lidhje me vlerën e polipilulës në parandalim te pacientët me sëmundje kardiovaskulare, u krye një rishikim sistematik i literaturës sipas udhëzimeve të Preferred Reporting Items for Systematic revievv e Meta-Analyses. Anëtarëve të panelit iu prezantuan disa deklarata dhe u kërkua të specifikojnë nëse "pajtohen", apo "nuk pajtohen" me secilën dhe të bëjnë ndonjë koment. Vlerësimet u kryen në dy raunde. Në raundin e parë, jurisë iu shpërndanë 22 deklarata dhe e njëjta metodë votimi u përdor përsëri për raundin e dytë.

Në raundin e parë e arritën konsensusin nëntë deklarata, ndërsa në raundin e dytë, kjo ndodhi për 10 deklarata. Në përgjithësi, pra, u arrit konsensusi për 19 deklarata që ishin përfaqësuese të pesë fushave të vlerësimit të vlerës së polipilulës, përkatësisht klinike, teknologjike, ekonomike dhe organizative. Gjatë një takimi përfundimtar në internet me të gjithë anëtarët e panelit, u diskutuan pikat akoma të hapura dhe anëtarët e panelit pranuan se, në mungesë të ndryshimeve në bio-disponueshmërinë midis barnave të administruara në kombinime fikse ose të lira, polipilula paraqiti një profil të raportit kosto/efikasitet, më të mirë sesa barnat e vetme.

Sipas ekspertëve, vendimmarrësit shpesh i ndruhen shumë përdorimit të polipilulës, sepse ata gabimisht e konsiderojnë përmirësimin e aderencës terapeutike si vlerën e vetme të formulimit unik. Përveç kësaj, mjekët shpesh preferojnë të rrisin vetëdijen dhe të përshkruajnë barna të ndara dhe kombinime të ndryshueshme në vend të dozave fikse dhe kombinimeve, nga frika e mjekimit të tepërt të pacientit. Pavarësisht nga këto konsiderata, studiuesit theksojnë se ky panel tregon vlerën e vërtetë në më shumë fusha për polipilulën. "Në këtë kontekst, vlerësimet e teknologjisë shëndetësore duhet të shoqërohen nga provat shkencore në dispozicion", shpjegojnë ata.