nën82021
Terapitë anti-Covid për trajtim në shtëpi. Së shpejti, edhe një pilulë nga kompania Pfizer
Pas molnupiravirit nga kompania Merck, medikamenti i parë oral i indikuar për trajtimin e Covid-19, vjen njoftimi mbi pilulën eksperimentale antivirale paxlovid (PF-07321332 plus ritonavir) nga Pfizer-i. Kështu, pasurohen mjetet farmaceutike të disponueshme për trajtimin në shtëpi të Covid-19 te personat jo të shtruar në spital.
FDA: Medikamenti i Pfizer-it drejt autorizimit për përdorim urgjent
Medikamenti i Pfizer-it, i shpallur ditët e fundit, është përcaktuar nga kompania si "një mjet që do të ndryshojë vërtet rregullat e lojës" në luftën kundër sëmundjes së shkaktuar nga coronavirusi, siç përshkruhet nga Albert Bourla, president dhe CEO i Pfizer-it. Kombinimi antiviral eksperimental paxlovid (PF-07321332 + ritonavir) ka treguar se ul probabilitetin e shtrimit në spital ose vdekjes nga çdo shkak i lidhur me Covidin me 89% në krahasim me placebon, te pacientët e rritur pozitivë, jo të shtruar në spital, por me rrezik të lartë për përparim drejt sëmundjes së rëndë, të trajtuar brenda 3 ditëve nga fillimi i simptomave. Një zbulim i ri i mundshëm për trajtimin në shtëpi, i cili shfaqi edhe një "aktivitet të fuqishëm in vitro kundër varianteve shqetësuese Sars-CoV-2, si dhe coronaviruseve të tjera të njohura", thekson kompania amerikane.
Nëse përfundon me sukses provat klinike, shpjegon Pfizer-i, bari "mund të përshkruhet gjerësisht si një trajtim në shtëpi për të ndihmuar në reduktimin e ashpërsisë së sëmundjes, shtrimeve në spital dhe vdekjeve, por edhe për të ulur gjasat e infektimit pas ekspozimit". Të dhënat e paraqitura nga kompania, në lidhje me një analizë të përkohshme të studimit të fazës 2-3 Epic-Hr, "sugjerojnë që kandidati ynë antiviral oral, nëse miratohet ose autorizohet nga autoritetet rregullatore, ka potencialin të shpëtojë jetën e pacientëve, të reduktojë ashpërsinë e infeksioneve nga Covid-19 dhe të eliminojë deri 9 nga 10 shtrime në spital", thekson Bourla. Me rekomandimin e një paneli të pavarur ekspertësh dhe në marrëveshje me Agjencinë Amerikane të Barnave FDA, Pfizer-i do të ndërpresë regjistrimin në eksperiment pikërisht për shkak të "efikasitetit të jashtëzakonshëm të demonstruar në këto rezultate" dhe planifikon t'i dorëzojë të dhënat e reja FDA-së "sa më shpejt të jetë e mundur", për të marrë autorizimin e përdorimit emergjent (EUA).