qer82022
Covid-19. Lulëzon tregu i zi për pilulat antivirale. Studimi në Bmj
Tregu i zi për pilulat anti-Covid po rritet, veçanërisht për molnupiravirin. Këto janë rezultatet e një sondazhi të publikuar në "British Medical Journal", gjë që thekson se si kjo kërkesë lidhet me një shpërndarje ende të pabarabartë të këtyre terapive. "Pacientët po i blejnë në internet këto pilula, të cilat mund të mos jenë të sigurta nëse merren pa mbikëqyrje mjekësore", paralajmëron autori i raportit, Gabriel G. Plata.
"Shpesh këto dërgesa mbërrijnë në SHBA nga Meksika", pohon studimi. Nga Meksika deri në kufi me Shtetet e Bashkuara "kutitë anti-Covid nisen për në Kili, Peru, Kolumbi dhe Brazil", shkruan Plata, i cili thekson se si "është zhvilluar një treg i zi botëror për molnupiravirin, pavarësisht rezultateve të dobëta të medikamentit, të dala nga studimet e fundit". Qeveria e Filipineve ka ngritur gjithashtu një alarm për përhapjen e paligjshme të pilulave molnupiravir në tregun e zi, duke i këshilluar qytetarët që të mos i blejnë ato nga burime të paautorizuara.
"Nuk ka asnjë garanci që barnat e blera në tregun e zi i janë nënshtruar kontrollit të duhur të cilësisë", thotë Paul Little, Universiteti i Southamptonit. Për më tepër, sipas ekspertit, "përdorimi i gjerë dhe i parregullt i antiviralëve mund të nxisë edhe rezistencën virale".
Hetimi zbuloi një faqe interneti buymolnupiravironline.com, me sa duket, me qendër në Londër, ku medikamenti shitet për 124,99 paundë, pa recetën e mjekut. "Në Meksikë janë në shitje dy gjenerikë të paautorizuar të molnupiravirit, të prodhuara nga da Azista dhe Merit Organics, nënvizon Plata, të cilat mund të gjenden në internet për rreth 14 mijë dollarë meksikanë (rreth 703 dollarë amerikanë) për një paketë me 40 tableta".
Sipas Pernette Bourdillon-Esteve, përgjegjëse e OBSH-së për gjurmimin e barnave nën standard ose të falsifikuara, "pabarazia është një forcë shtytëse në shpërndarjen e produkteve medicinale nën standarde dhe të falsifikuara". Sipas të dhënave nga Universiteti Duke, pjesa më e madhe e furnizimit me molnupiravir është marrë nga vendet me të ardhura të larta, një trend që pritet të vazhdojë në vitin 2022.