kor22019
Produktet për kujdesin personal. 60% e fëmijëve të paraqitur në urgjencë, janë nën 2 vjeç
Shampo, kremra, make-up, manikyr për thonjtë dhe parfume. Këto janë produkte që duken të sigurta, por që në duart e fëmijëve të vegjël mund të shndërrohen në rreziqe të vërteta. Një studim i kryer nga studiuesit në Spitalin Mbarëkombëtar të Fëmijëve, tregon se në periudhën 2002-2006, 64.686 fëmijë nën pesë vjeç u trajtuan në departamentet e urgjencave të SHBA-së për produktet që lidhen me kujdesin personal. "Që i korrespondon një fëmije çdo dy orë", thotë Rebecca McAdams, bashkautore e një studimi të botuar në "Clinical Pediatrics".
Pjesa më e madhe e dëmtimeve janë djegiet kimike (13.8%) ose helmimet (86.2%) që ndodhin pas gëlltitjes (75.7%) ose kontakti me lëkurën ose sytë (19.3%). "Fëmijët e kësaj moshe nuk lexojnë, prandaj nuk e dinë se çfarë po shikojnë. Ata shohin vetëm disa shishe të vogla me etiketa me ngjyrë që duken si ushqim apo pije, kështu që përpiqen t'i hapin dhe të gëlltisin përmbajtjen e tyre", shkruajnë studiuesit. Dhe, kur shishja rezulton se është hollues për manikyr dhe jo lëng frutash, ose një locion dhe jo kos, mund të ndodhin edhe dëmtime serioze. Tre produktet në krye të listës janë ato për kujdesin e thonjve (28.3%), flokëve (27.0%) dhe lëkurës (25.0%), pasuar nga produktet e parfumerisë (12.7%).
"Shqetësuese është lehtësia e qasjes: fëmijët i shikojnë prindërit e tyre duke i përdorur ato dhe përpiqen të imitojnë sjelljen e tyre. Duke qenë se enët, tretësit dhe kremrat shpesh ruhen në vende që janë të lehta për t'u arritur dhe përveç kësaj, në enë që nuk kanë kufizime të posaçme për fëmijë, është e lehtë për fëmijët e vegjël të marrin dhe t'i hapin ato", vazhdon autori, duke theksuar rëndësinë e ruajtjes së sigurt, larg vendeve të arritshme nga të vegjlit, mundësisht në dollapë me brava ose çelësa.
"Kurrë mos lini produkte të kujdesit personal pa mbikëqyrje, mos i lini ato menjëherë pas përdorimit dhe ruajini në enët origjinale. Këto masa të thjeshta parandalojnë ngjarje të rrezikshme dhe ardhje të dëshpëruara në urgjencë, ku pothuajse 60% e lëndimeve ndodhin te fëmijët nën dy vjeç", përfundon McAdams.
https://doi.org/10.1177/0009922819850492