dhj122014

Beqaj: Kontrolli mjekësor, synojmë mbulim universal

Në kontekstin e fushatës sensibilizuese 'Si je" për programin e kontrollit mjekësor bazë, është organizuar të premten në Tiranë seminari me të njëjtën tematikë, ku të pranishëm kanë qenë përfaqësues të Organizatës Botërore të Shëndetësisë dhe ministri i Shëndetësisë, Ilir Beqaj. Gjatë fjalës përshëndetëse, Beqaj nënvizoi objektivat e caktuara që kujdesi shëndetësor ndaj popullsisë të jetë sa më i plotë dhe i arritshëm nga të gjithë: ''OBSH dhe Banka Botërore i janë bashkuar nismës së mbulimit universal të kontrolleve mjekësore, përkrah partnerëve botërorë. Në këtë drejtim, të gjitha vendet duhet të zhvillojnë ide inovatore për të arritur objektivin'', u shpreh ministri duke theksuar se është e domosdoshme që të ndërgjegjësohemi të gjithë për kryerjen e kontrolleve të rregullta në qendrat shëndetësore. Ai shtoi se dikasteri i tij ka vendosur të zhvillojë një program bazë të mbulimit universal.
Në një masë dërmuese në Shqipëri sëmundjet përcaktohen nga tre faktorë madhorë risku: ushqyerja jo e shëndetshme, presioni i lartë i gjakut dhe konsumi i duhanit. Individët e grupmoshës 40-65 vjeç kanë rrezik më të lartë për një sërë situatash shëndetësore jo të favorshme dhe pikërisht këta do të jenë të parët që përfitojnë kontrollin mjekësor pa pagesë.