kor152019
Nga një bakter, krijohet koliri që përmirëson simptomat e retinopatisë
Ekziston mundësia për të marrë nga një proteinë bakterike një kolir të nevojshëm për të përmirësuar shikimin në retinopati. Ky është përfundimi i një studimi italian, të kryer nga kërkuesit e Institutit të Lartë të Shëndetësisë (ISS) dhe Universitetit të Bolonjës.
"Administrimi lokal i një koliri me pika në sy që përmban një solucion me faktorin citotoksik nekrotizant 1 (CNF1) të Escherichia Coli-t ka përmirësuar performancën vizuale të retinopatisë hipertensive në një model kafshësh", thotë Andrea Matteucci, autori i parë i punës së botuar në "Neuroscience".
Sipas studiuesve, CNF1 mund të veprojë si një antiinflamator, duke modifikuar aktivitetin e proteinës Rac1 në retinë dhe duke përmirësuar kështu funksionin vizual. Proteina Rac1 është pjesë e GTPases Rho, proteina të vogla rregullatore të përfshira në proceset inflamatore dhe në përgjigjen ndaj stresit oksidativ në nivel vaskular. Më parë, studime të tjera nga i njëjti grup pune kanë dhënë rezultate inkurajuese për përdorimin e CNF1 në modelet e sëmundjeve të tjera me një komponent neuroinflamator.
"Duke treguar se veprimi në aktivitetin e proteinës Rac1 është në gjendje të përmirësojë funksionalitetin në një retinë tashmë të komprometuar, kemi hapur rrugën për strategji të reja terapeutike që synojnë patologjitë vizive, në patogjenezën e të cilave ekziston një komponent i rëndësishëm neuro-inflamator. Flas për sëmundje shumë invalidizuese, si retinopatia hipertensive, retinopatia diabetike dhe glaukoma, për të cilat nuk ka shërim sot", thotë Carla Fiorentini, një nga dy autorët kryesorë të studimit. "Ky studim ka demonstruar efikasitetin e trajtimit topik me CNF1 në retinopatinë e hipertensionit, si dhe nga pikëpamja biokimike, edhe nëpërmjet analizave të sjelljes dhe elektrofiziologjike, që i bëjnë këto rezultate edhe më inkurajuese për zhvillimin e një bari të ri potencial", përfundon ai.
Neuroscience 2019. Doi: 10.1016/j.neuroscience.2019.05.021
https://www.ncbi.nlm.nih.gov/pubmed/31128161