qer272014

Mëlçia e dëmtuar por nën kontroll

Food and Drugs Administration (FDA), Agjensia e Kontrollit të Ushqimeve dhe Barnave në SHBA, kërkoi tërheqjen e disa suplementëve dietikë të përdorur për të humbur peshë dhe për të rritur masën muskulare, gjithashtu të dyshuar për favorizimin e insufiçencës hepatike dhe hepatitit jo-viral tek konsumatorët . Përtej rastit specifik që shkaktoi dërgimin e letrave të paralajmërimit dhe për kompani të tjera që tregtojnë produkte të ngjashme, Enti rregullator po mbështet një fushatë informative për parandalimin e dëmtimit hepatik lidhur me përdorimin  e barnave OTC dhe suplementëve. Mëlçia është një organ i fuqishëm por në të njëjtën kohë delikat, që kryen një sërë funksionesh të pazëvendësueshme në metabolizëm dhe në pastrimin e organizmit duke ndihmuar në eliminimin e toksinave. Marrja e substancave të caktuara mund të bllokojë këtë mekanizëm duke shkaktuar dëme ndonjëherë të pakthyeshme në funksionalitetin e saj. Sfida e ekspertëve është të identifikojnë paraprakisht  një listë produktesh që duken të sigurtë në fazën para-klinike, por potencialisht të rrezikshëm për disa individë shumë të ndjeshëm ndaj dëmeve në mëlçi. Përshkrimi i barnave OTC  dhe suplementëve ushqimorë është në fakt një nga shkaqet kryesore të insufiçencës hepatike akute. Nëse e krahasojmë  me gjithë të tjerat, nuk është e lehtë të identifikojmë kategorinë e pacientëve më të rrezikuar sepse lidhja ndërmjet trajtimit  dhe efekteve anësore, sidomos në pleqëri dhe në rastet e politerapisë, nuk është lineare dhe nuk është raportuar. Nëse flasim në përgjithësi, simptomat e helmimit hepatik ku duhet të kemi vëmendje janë lodhja jospecifike, nauze, anoreksi, pafuqi, prurit i përhapur, zverdhje e sklerave. Paracetamoli kujton FDA, është një nga barnat në shqyrtim kur merret në doza të mëdha, edhe pa dashje, duke qenë i pranishëm si përbërës në barnat OTC të indikuara për sëmundjet e ndryshme si temperaturë, alergji, dhimbje muskulare.