dhj182014
FDA miraton barin për menaxhimin kronik të peshës
Administrata e Barnave dhe Ushqimit (FDA) në Shtetet e Bashkuara ka miratuar naltrexon hidroklorid dhe bupropion hidroklorid si mundësi trajtimi për menaxhimin kronik të peshës, bashkë me një dietë hipokalorike dhe aktivitet fizik. Bari është miratuar për përdorim te të miturit me një tregues të peshës trupore (BMI) të barabartë ose më të lartë (obezitet) se 30 dhe te të rriturit me një BMI të barabartë ose më të lartë se 27 (mbipeshë), të cilët kanë të paktën një problematikë të lidhur me peshën, si hipertensioni, diabeti i tipit 2, ose dislipidemia. BMI-ja, e cila mat yndyrën trupore në bazë të peshës dhe gjatësisë së një individi, përdoret për të matur obezitetin dhe kategoritë e peshës së shtuar. "Sipas Centers for Disease Control and Prevention" më shumë se një e treta e të rriturve në Shtetet e Bashkuara janë obezë.
Bëhet fjalë për një kombinim të naltrexon-it me bupropion-in në një formulim të vetëm.
Naltrexon-i është aprovuar për trajtimin e alkoolit dhe varësisë së opiateve. Bupropion-i është miratuar për trajtimin e depresionit dhe çrregullimeve emocionale stinore, ose si një ndihmës për të hequr dorë nga duhani. Efikasiteti i barit është vlerësuar në studime të ndryshme klinike që kanë përfshirë rreth 4.500 pacientë obezë dhe mbi peshë, të cilët janë trajtuar për një vit rresht me të. Të gjithë pacientët kanë modifikuar stilin e tyre të jetesës me një dietë hipokalorike dhe aktivitet të rregullt fizik.
Rezultatet e një studimi klinik që ka ekzaminuar pacientët pa diabet kanë treguar se ata kanë pasur një rënie më peshë mesatarisht me 4.1% në krahasim me trajtimin me placebo (pilulë inaktive) në një vit. Në këtë lloj studimi, rreth 42% e pacientëve të trajtuar me kombinimin e barnave të aprovuara nga FDA kanë humbur të paktën 5% të peshës së vetë trupore në krahasim me 17% të pacientëve të trajtuar me placebo.
Rezultatet e një studimi klinik që ka ekzaminuar pacientë me diabet të tipit 2 ka treguar se ata kanë pasur një rënie në peshë mesatarisht prej 2% në krahasim me trajtimin me placebo. Në këtë studim 36% e pacientëve të trajtuar me naltrexon dhe bupropion ka humbur të paktën rreth 5% të peshës trupore në krahasim me 18% të pacientëve të trajtuar me placebo.
Meqë përmban bupropion, operatorët shëndetësorë dhe pacientët janë të paralajmëruar për një risk të rritjes së mendimeve vetëvrasëse. Paralajmërimi tregon gjithashtu se situata të rënda neuropsikiatrike janë raportuar te pacientët që merrnin bupropion si ndihmës për të lënë duhanin. FDA ka kërkuar studime të ndryshme post-marketing.