maj282018
Migrena. FDA-ja aprovon barin e parë parandalues.
FDA-ja ka aprovuar përdorimin e erenumabit për pacientët me migrenë. Bari, një antitrup monoklonal është i disponueshëm në një formulim vetëinjektues që merret një herë në muaj dhe që është një antagonist i receptorit të peptidit të lidhur me gjenin e kalcitoninës (CGRP). Ky është bari i parë i kësaj klase që merr aprovimin e FDA-së.
"Erenumabi u ofron pacientëve një opsion të ri trajtimi për të reduktuar numrin e ditëve me migrenë. Kemi nevojë për trajtime të reja për këtë gjendje të dhimbshme dhe shpesh, dobësuese", ka deklaruar në një deklaratë për shtyp Eric Bastings, Qendra për Vlerësimin dhe Kërkimin mbi Barnat, FDA.
Vetëm në Itali, dhimbja e kokës godet më shumë se 26 milionë vetë dhe patologjia është përfshirë nga OBSH-ja në radhën e dhjetë shkaqeve të para që shkaktojnë paaftësi në botë.
"Një seri të dhënash na tregojnë se pacientët me migrenë nuk janë kuruar si duhet", thotë Fabio Frediani, president i ANIRCEF (Shoqata Neurologjike Italiane për Kërkime mbi Cefaletë). "Ky është një problem që po përpiqemi ta zgjidhim prej shumë vitesh tashmë, duke e sensibilizuar opinionin publik që nuk e njeh entitetin e fenomenit dhe vetë pacientët që dinë se sa vuajnë, por nuk dinë se ka edhe terapi".
Është e rëndësishme që pacientët të dinë se shumë shpejt do të kemi në dispozicion, për të parën herë, molekula efikase për një terapi parandalimi, ndërkohë që kemi të tjera mundësi, për terapinë simptomatike të sulmit.
"Tani do të kemi këto molekula novatore, por të tjera do të kemi në të ardhmen", vazhdon Frediani. "Studimet paraprake dëshmojnë një efikasitet terapeutik që i kapërcen rezultatet e arritura në të shkuarën me molekulat jo specifike, që jepnin ndonjë rezultat, po me shumë efekte anësore. Kështu, sot kemi me siguri një mundësi më shumë, sepse këto molekula janë sintetizuar për të bllokuar mekanizmin specifik të migrenës dhe jo dhimbjen: nuk janë barna kundër dhimbjes, por kundër migrenës".
Eksperti shpjegon se një bar konsiderohet efikas, "kur marrim reduktimin e të paktën 50% të sulmeve dhe me molekulat e reja, kjo arrihet në 75% të rasteve, pra, ka një normë të lartë efikasiteti, që sigurisht, duhet vërtetuar në praktikën klinike. Por, çfarë duhet veçuar është se, duke i përdorur këto barna në mënyrë afatgjatë, kemi patur një pacient në katër pa sulme dhe pa efekte anësore në muajin e fundit të vlerësimit, kur para terapisë, ai vuante nga 2-3 tre ditë me migrenë në javë".