shk272019
Hipertensioni. FDA-ja bën hetime të mëtejshme për barnat e tërhequra nga tregu
Nuk ka përfunduar ende, historia e barnave shumë të njohura të hipertensionit, të tërhequra nga tregu në faza të ndryshme që nga vera e kaluar, si në BE, ashtu edhe në SHBA, për shkak të pranisë së papastërtive kancerogjene.
Kjo është ndërhyrja më e madhe dhe më e ndërlikuar për të ndaluar shitjen e barnave me recetë të përdorura nga miliona pacientë. Por, Administrata Amerikane e Ushqimit dhe e Barnave (FDA), ka nënkuptuar, në mikrofonët CNN-së se "ndoshta do të ketë edhe më shumë për të zbuluar". Në disa lote të produkteve të kategorisë së "bllokuesve të receptorëve të angiotensinës II" (me siglën ARB), është zbuluar prania e N-nitrosodimethylamines, një substancë e përdorur në lëngjet për raketa. Në disa raste janë identifikuar gjurmë të "nitrosaminës", një substancë tjetër që konsiderohet si kancerogjene.
FDA-ja po punon aktualisht në bashkëpunim me autoritetet dhe inspektorët e laboratorëve të kompanive prodhuese edhe jashtë vendit: "Hetimi nuk ka përfunduar", tha Janet Woodcock, drejtor i departamentit për vlerësimin farmakologjik në FDA, duke thënë se pritet gjetja edhe e loteve të tjera të kontaminuara. Ndërkohë, Komiteti i Energjisë dhe i Tregtisë në Dhomën e Deputetëve në SHBA, në një letër drejtuar komisionerit të FDA-së, Scott Gottlieb, ka kërkuar të raportohet mbi gjendjen e barnave ARB dhe në veçanti, mbi origjinën e ndotjes në dy kompanitë, njëra në Kinë dhe tjetra, në Indi.