Kanceri kolorektal. Aspirina redukton rrezikun, por kujdes me gjakderdhjen

tags: ASPIRINA, Hemorragji, Kanceri kolorektal, parandalim

Artikuj lidhur

17-10-2022 | Aspirina mund të jetë efikase në parandalimin primar kardiovaskular. Ja, në cilat raste

09-11-2022 | Gjakderdhja e shkaktuar nga aspirina. Ja, si mund të reduktohet

27-09-2022 | Përdorimi edhe i aspirinës përkrah antikoagulantëve mund të rrisë rreziqet. Ja, në cilat raste

Sipas një studimi të botuar në "Annals of Oncology", marrja e aspirinës do të shoqërohej me një reduktim të rrezikut për kancer kolorektal dhe kancere të tjera të sistemit gastrointestinal.

"Përdorimi i rregullt i aspirinës, ose marrja e të paktën një ose dy tabletave në javë, shoqërohet me një ulje të konsiderueshme të rrezikut për zhvillim të disa lloj kancereve", thotë Cristina Bosetti, Instituti i Kërkimeve Farmakologjike "Mario Negri", Irccs, autore kryesore e studimit. "Në veçanti, ka pasur një ulje prej 27% të rrezikut për kancer kolorektal, 33% për kancer të ezofagut, 39% për kancer kardiak, 36% për kancer të stomakut, 38% për tumoret hepatobiliare", thotë ajo.

Studiuesit vlerësuan 113 studime vëzhguese në lidhje me marrëdhëniet midis aspirinës dhe rrezikut të kancereve të sistemit të tretjes, shumica e të cilave kishin të bënin me kancerin kolorektal. Pikërisht për këtë lloj kanceri, ekspertët analizuan në detaje efektin e dozës dhe kohëzgjatjes së terapisë, duke vëzhguar se rreziku i zhvillimit të tij zvogëlohej, me rritjen e dozës. Në fakt, në krahasim me ata që nuk përdorin aspirinë, pati një ulje të rrezikut prej 10% me dozë midis 75 dhe 100 mg në ditë, 35% me dozë 325 mg në ditë dhe 50%, me dozë 500 mg në ditë.
Autorët theksojnë se, megjithatë, vlerësimi për doza të larta të aspirinës është llogaritur në pak raste dhe për këtë arsye, duhet vlerësuar me kujdes.

Sa i përket kohëzgjatjes së terapisë, është vërejtur se rreziku zvogëlohet me 4% pas një viti përdorimi, me 11% pas tre vjetësh, me 19% pas pesë vjetësh dhe me 29%, pas dhjetë vjetësh. "Vëzhgimet tona sugjerojnë që doza më të larta të aspirinës shoqërohen me një ulje më të madhe të rrezikut të kancerit kolorektal. Sidoqoftë, zgjedhja e dozës duhet të marrë parasysh rrezikun e mundshëm të hemorragjisë gastrointestinale, si dhe hemorragjive të tjera, që rritet për doza të larta. Marrja e aspirinës për parandalimin e kancerit kolorektal ose tumoreve të tjera gastrointestinale duhet në çdo rast të bëhet pasi të jeni konsultuar me një mjek, i cili do të marrë parasysh rrezikun individual", përfundon Bosetti.

Annals Oncology 2020. Doi: 10.1016/j.annonc.2020.04.16
https://www.ncbi.nlm.nih.gov/pubmed/32272209