qer172020
Antibiotiku i ri. FDA-ja aprovon kombinimin për pneumoninë bakteriale
Administrata e Ushqimit dhe e Barnave në SHBA (FDA) ka aprovuar kombinimin e imipenemit, cilastatinës dhe relibaktamit (Recarbrio) për trajtimin e pneumonisë bakteriale të fituar në spital dhe pneumonisë bakteriale të lidhur me ventilatorin (Habp/Vabp) te pacientët 18 vjeç e lart. Bari ishte aprovuar më parë në Shtetet e Bashkuara për trajtimin e infeksioneve të komplikuara të traktit urinar dhe infeksioneve të komplikuara intraabdominale me mundësi të kufizuara ose pa mundësi trajtimi.
Siguria dhe efikasiteti i kombinimit të antibiotikut për këto indikacione shtesë u vlerësuan në një studim me përzgjedhje rastësore, të kontrolluar me 535 të rritur të shtruar në spital me Habp/Vabp për shkak të baktereve gramnegative: 266 pacientë u trajtuan me Recarbrio dhe 269 pacientë me piperaciline-tazobaktam. Në përgjithësi, në ditën e njëzetetetë të studimit, 16% e pacientëve të trajtuar me Recarbrio dhe 21% e të tjerëve kishin vdekur. Reagimet më të shpeshta anësore të vërejtura te pacientët e trajtuar me Recarbrio përfshijnë rritjen e aspartat/alanine aminotransferazës, anemisë, diarresë, hipokalemisë dhe hiponatraemisë.
Recarbrio është përcaktuar si pjesë e Programit të Kualifikuar të Sëmundjeve Infektive (QIDP), të parashikuar nga GAIN (Generating Antibiotic Incentives Now), në Aktin për Siguri dhe Novacion të FDA-së, të cilin agjencia amerikane ua atribuon antibakterialëve dhe antimykotikëve të destinuar për të trajtuar infeksione serioze ose kërcënuese për jetën. Si pjesë e përcaktimit të QIDP-së, Recarbrio është trajtuar me prioritet të lartë.