kor92024
Alzheimer. FDA miraton terapinë e re për formën simptomatike të hershme
Administrata e Ushqimit dhe Barnave (FDA) në SHBA, ka miratuar donanemabin (350 mg/20mL injeksion një herë në muaj nëpërmjet një infuzioni intravenoz), si trajtim për të rriturit me Alzheimer simptomatik të hershëm (AD), i cili përfshin individë me rënie të lehtë konjitive dhe individë me demencë në stad të lehtë për shkak të AD, me patologji amiloide të konfirmuar.
Nëpërmjet një udhëzimi, FDA thekson se donanemabi mujor është terapia e parë dhe e vetme që synon pllakat amiloide me evidenca që mbështesin ndërprerjen e terapisë kur këto pllaka hiqen.
"Alzheimer është një sëmundje rraskapitëse për individin e diagnostikuar dhe për njerëzit e tij të dashur. Të dhënat e këtij studimi kanë treguar në mënyrë bindëse se ky bar e redukton normën e rënies konjitive dhe funksionale te pacientët në stadet e rënies konjitive të lehtë dhe të demencës së lehtë të sëmundjes së Alzheimer".
"Donanemabi ka shfaqur rezultate të dukshme te individët me sëmundje të Alzheimerit simptomatik të hershëm, të cilët kanë urgjentisht nevojë për opsione terapeutike efikase. Ne e dimë që këto barna sjellin përfitim maksimal, kur individët trajtohen herët dhe po punojmë intensivisht për përmirësimin e kapjes dhe diagnostikimit të kësaj sëmundjeje. Çdo vit, po shtohet akoma më shumë numri i individëve në rrezik për zhvillim të kësaj sëmundjeje dhe ne jemi të vendosur të përmirësojmë jetën e tyre", pohon presidenti dhe administratori i qendrës së studimit, Elias Khail.