jan122021
Vaksinat Covid. Komunikata e CDC-ve në lidhje me reaksionet anafilaktike
Deri më tani, janë 21 rastet e përgjithshme të reaksioneve anafilaktike ndaj vaksinave anti-Covid të Pfizerit dhe Modernës, nga gjithsej 1.9 milionë doza të administruara në SHBA në javën e parë dhe gjysmën e fushatës së vaksinimit. Nga 21 vetë, 17 kishin histori të alergjive ose reaksioneve alergjike ndaj barnave, ushqimeve ose pickimeve të insekteve. Qendra për Kontrollin e Sëmundjeve (CDC) e ka komunikuar këtë në një konferencë shtypi ditët e fundit.
Norma e reaksioneve anafilaktike është 11.1 raste për një milion doza të administruara, shumë më e lartë se 1.3 raste për milion, që ndodhin me vaksinën antigrip, por që sidoqoftë, "mbetet një dukuri e rrallë", ka thënë Nancy Messonnier, drejtoreshë e Qendrës Kombëtare të Imunizimit dhe Sëmundjeve Respiratore të CDC-së. Mosha mesatare e njerëzve që përjetuan këto reagime ishte 40 vjeç dhe simptomat u shfaqën brenda 13-15 minutash. Në bazë të këtyre të dhënave, CDC-ja po modifikojnë indikacionet e tyre, duke specifikuar se, ata që kanë një reaksion të menjëhershëm ose alergjik ndaj dozës së parë të vaksinës, nuk duhet të bëjnë të dytën. Për më tepër, ata që e dinë tashmë se janë alergjikë ndaj përbërësve të vaksinës, të tilla si glikol polietileni dhe polisorbati, ose përbërës të tjerë të ngjashëm, nuk duhet të vaksinohen tani. Ata me histori të reaksioneve alergjike ndaj vaksinave të injektueshme ose anafilaksisë për çfarëdo lloj shkaku, rekomandohet që të monitorohen për 30 minuta pas vaksinës.
"Aktualisht, përfitimet e njohura dhe të mundshme të vaksinave i tejkalojnë rreziqet e marrjes së Covidit. CDC-ja dhe FDA-ja po analizojnë të gjitha raportimet e reaksioneve anësore për të përcaktuar nëse ato mund të lidhen me vaksinimin, përfundon Messonnieri. Në shumë raste, në fakt, mund të jenë rastësi. Vaksinat anti-Covid, përsërisim, janë të sigurta". Rekomandimet e CDC-së zbatohen për vaksinat Pfizer dhe Moderna, të dyja me mRna.