kor12021
Covid-19. Së shpejti, pesë terapi në dispozicion në Evropë. Ja, se cilat
Vijnë rezultatet e para të strategjisë së BE-së mbi terapitë për Covid-19. Komisioni Evropian ka bërë të njohur një portofol të parë prej pesë trajtimesh që "së shpejti mund të jenë në dispozicion për të trajtuar të sëmurët në BE". Katër nga këto barna janë antitrupa monoklonalë, të cilët janë nën rishikim nga EMA. I pesti është një imunosupresant, i cili ka autorizim për marketing që mund të shtrihet edhe në trajtimin e pacientëve me Covid.
Për Komisioneren Evropiane të Shëndetësisë Stella Kyriakides, "ndonëse vaksinimi po rritet me shpejtësi, virusi nuk do të zhduket dhe pacientët do të kenë nevojë për trajtime të sigurta dhe efektive për të zvogëluar barrën e Covid-19". Pesë produktet, shpjegon Komisioni, janë në një fazë zhvillimi "të përparuar" dhe kanë një "potencial të lartë për të qenë në mes të tre terapive të reja për Covid-19, që do të marrin autorizim deri në tetor 2021", një synim i vendosur nga strategjia, gjithmonë nëse shfaqen të sigurta dhe efektive. Më hollësisht, bëhet fjalë për një indikacion të ri të një bari ekzistues, imunosupresantit Baricitinib (një bar që ul aktivitetin e sistemit imunitar), prodhuar nga Eli Lilly. Kërkesa po shqyrtohet nga EMA. Katër të tjerët janë antitrupa monoklonalë, të cilët janë gjithashtu nën shqyrtim të përshpejtuar nga EMA, për rishikimin e të dhënave klinike. Në veçanti, është një kombinim i Bamlanivimabit dhe Etesevimab-it nga Eli Lilly; një kombinim i Casirivimabit dhe Imdevimabit nga Regeneron Pharmaceuticals dhe Roche; të Regdanivimab nga Celltrion; të Sotrovimabit nga GlaxoSmithKline dhe Vir Biotechnology.
Strategjia e BE-së mbi terapitë për Covid-19 nuk është asgjë më shumë sesa përsëritja e metodës së përdorur për vaksinat, e cila rezultoi e suksesshme në planin afatmesëm, domethënë centralizimi, në nivelin e Komisionit Evropian, i blerjes së barnave, në emër të 27 shteteve anëtare. Strategjia përfshin të gjithë ciklin jetësor të barnave, nga kërkimi dhe zhvillimi, deri te prodhimi, blerja dhe shpërndarja. Është pjesë e atij Unioni Shëndetësor që po përpiqet të ndërtojë Komisioni i Ursula von der Leyenit, pas mësimeve të ashpra të dhëna nga pandemia e Covid-19. Qëllimi fillestar ishte që të autorizohen tre trajtime Covid deri në tetor dhe dy të tjera deri në fund të vitit.