gus232021
Covid-19, rezultate kontradiktore mbi kohën e qëndrimit në spital, me përdorimin e remdesivirit
Antivirali remdesivir, i miratuar nga Administrata e Ushqimit dhe Barnave (FDA) për trajtimin e infeksionit COVID-19, lidhet me një qëndrim më të gjatë në spital pa përmirësuar normat e mbijetesës, sipas një artikulli të botuar në JAMA Network Open. Studimi retrospektiv i "jetës reale" përfshiu 5,898 pacientë të shtruar në 123 spitale të Administratës Shëndetësore të Veteranëve nga 1 maji deri më 8 tetor 2020, gjatë periudhës së Autorizimit të Përdorimit Emergjent të barit (EUA), para se ai të miratohej zyrtarisht nga FDA-ja.
Dhe ashtu si në rastin e eksperimentimit me përzgjedhje rastësore Adaptive COVID-19 Treatment Trial (ACTT-1), i cili kontribuoi në miratimin e barit nga FDA-ja, të dhënat nuk treguan ndonjë ndryshim statistikisht të rëndësishëm në vdekshmërinë për 30 ditë (12,2 % e grupit remdesivir kundrejt 10.6% të kontrolleve). "Dallimi, megjithatë, qëndron në kohëzgjatjen e shtrimit në spital: nga ACTT-1 del një reduktim, 15 ditë për kontrollet dhe 10 për remdesivirin, ndërsa në këtë studim ditët janë 6 për remdesivirin dhe 3 për kontrollet që nuk trajtohen me antiviralë", shpjegon nënshkruesi i parë, Michael Ohl. Gio Baracco (Universiteti i Majemit, Florida), komenton në një editorial: "Shpjegimi më i mundshëm se pse remdesiviri është i lidhur me një rritje dhe jo me reduktimin e shtrimit në spital mund të jetë se pacientët mbahen në spital më gjatë sesa është e nevojshme për të përfunduar trajtimin".
Për të kuptuar pse mund të ketë ndodhur kjo, editorialisti kujton se gjatë studimit EUA, pacientët duhej të plotësonin kriteret e përfshirjes dhe përjashtimit, të jepnin pëlqimin verbal dhe të monitoroheshin për ngjarjet e padëshiruara, përfshirë reagimet ndaj infuzionit dhe analizat e përditshme laboratorike të funksionit renal dhe hepatik. "Aplikimi në jetën reale i një bari që premton të përshpejtojë daljen nga spitali, duhet të përfshijë si rezultat kryesor një vlerësim se sa e lehtë është të arrihet ai rezultat dhe të bëhet e qartë se sapo një pacient ta arrijë atë pikë, ata mund ta ndalojnë barin. Rezultatet kontradiktore të këtij studimi në krahasim me ACTT-1 e ilustrojnë qartë këtë aspekt".
JAMA Network Open 2021. Doi: 10.1001/jamanetworkopen.2021.14741
http://doi.org/10.1001/jamanetworkopen.2021.14741
JAMA Network Open 2021. Doi: 10.1001/jamanetworkopen.2021.16057
http://doi.org/10.1001/jamanetworkopen.2021.16057