mar142023
Antihipertensivët. Trajtim i mundshëm për diabetin 1 te fëmijët
Një studim i ri amerikan i publikuar në "JAMA" ka treguar se verapamili, i përdorur zakonisht për të trajtuar presionin e gjakut mund të sigurojë edhe funksionimin e pjesshëm të pankreasit te fëmijët e sapo diagnostikuar me diabet të tipit 1. "Ky medikament jo vetëm që ka kosto efektive, por është gjithashtu një medikament popullor, i mirë toleruar, me një profil të favorshëm sigurie", thotë bashkautorja Anna Neyman nga Universiteti i Indianës, duke shtuar se shumë familje dhe fëmijë të diagnostikuar me diabet të tipit 1 do të përfitojnë nga provat e reja të dala nga ky studim.
Medikamenti tashmë në përdorim, i mirë toleruar, me një profil të favorshëm sigurie
Në diabetin e tipit 1, pankreasi zvogëlon në mënyrë progresive prodhimin e tij të insulinës derisa të ndalojë plotësisht. Sa më gjatë të vazhdojnë të funksionojnë qelizat në pankreas, të paktën në një farë mase, aq më i ulët është rreziku i komplikimeve, për shembull për veshkat dhe shikimin.
Për të vlerësuar funksionin e qelizave pankreatike, studiuesit përdorën një shënjues të quajtur sekretimi i peptidit C. Te 47 fëmijët pjesëmarrës në studim, të cilët morën një pilulë verapamil në ditë, u zbulua se nivelet e C-peptidit ishin 30% më të larta një vit pas diagnostikimit, krahasuar me 41 fëmijë që morën vetëm një placebo.
Pas një viti, nuk kishte dallime domethënëse midis grupeve në nivelet e hemoglobinës A1c, një masë e përdorur zakonisht për matjen e niveleve të sheqerit në gjak. Studiuesit mundën ta testonin verapamilin vetëm te fëmijët që peshonin të paktën 30 kg, sepse dozat për fëmijët më të vegjël aktualisht nuk janë të disponueshme në treg.
Të gjithë pacientët e regjistruar në studim po përdornin tashmë insulinë për të kontrolluar sheqerin në gjak. Sidoqoftë, të dhënat mbështesin studimin e ilaçit në pacientët me diabet presimptomatik të tipit 1, domethënë përpara se të zhvillohet varësia nga insulina.
Cristoforo Zervos
Burimi:
https://jamanetwork.com/journals/jama/fullarticle/2801974?widget=personalizedcontent&previousarticle=2801976