gus52024
Semaglutidi galenik. FDA: Kujdes me mbidozimin. Ja, udhëzimet
FDA raporton për efekte anësore, disa prej të cilave edhe me shtrim në spital, që lidhen me mbidozimin e semaglutidit, për shkak të gabimeve në dozimin e injeksioneve të personalizuara. Sipas FDA, gabimet mund të rezultojnë nga fakti që pacientët kanë matur në mënyrë të pavarur doza të pasakta të medikamentit, ose që profesionistët e kujdesit shëndetësor i kanë llogaritur gabim dozat. Në çdo rast, entet rregullatore ftojnë një pjesë të pacientëve të flasin me mjekun ose me farmacistin që përgatit medikamentin, në mënyrë që ata t'u shpjegojnë si të matin dhe administrojnë dozën e parashikuar dhe nga ana tjetër i fton farmacistët që t'u japin pacientëve shiringa në përmasat e dozës së parashikuar dhe t'i këshillojnë ata mbi mënyrën e përdorimit.
Efektet anësore
Sinjalizimet kishin të bënin me pacientët që e kishin marrë medikamentin në doza të personalizuara, në flakonë me shumë doza të përgatitura ad hoc, por që nuk kishin eksperienca të mëparshme me autoinjeksionet, si dhe në marrjen e medikamentit nga flakoni në shiringë dhe ngatërrimet e njësive të ndryshme matëse (p.sh. mililitra, miligramë dhe njësi) mund të ndikojnë në gabime në dozim.
Disa pacientë kishin nevojë për kujdes mjekësor apo për t'u shtruar në spital dhe efektet anësore përfshinin: efektet gastrointestinale (p.sh. të përzierat, të vjellat, dhimbjet abdominale), gjendjet e të fikëtit, dhimbjen e kokës, migrenën, dehidratimin, pankreatitin akut dhe gurët në tëmth.
FDA paralajmëron edhe përshkruesit, të cilët duhet të jenë vigjilentë në momentin e përshkrimit dhe administrimit të semaglutidit në doza të personalizuara, pasi ato mund të jenë të disponueshme në përqendrime të ndryshme. Në rast dyshimi, duhet të konsultohen me farmacistin, përsa i përket përllogaritjes së dozës së duhur të barit që do të përshkruajnë, apo administrojnë.
Sipas tyre, injeksionet e personalizuara të semaglutidit paraqesin më shumë rrezik për pacientët, krahasuar me barnat e miratuara nga FDA pasi nuk i nënshtrohen analizimit përpara hedhjes në treg të FDA, përsa i përket sigurisë, cilësisë, ose efikasitetit. Kështu, ato duhet të përdoren vetëm për pacientët, nevojat mjekësore të së cilëve nuk mund të përmbushen nga një bar i miratuar nga FDA, por kjo e fundit është e vetëdijshme se farmacistët e ofrojnë semaglutidin në përqendrime të ndryshme.
Rekomandimet e FDA
FDA publikoi disa rekomandime me qëllim reduktimin e këtyre rreziqeve:
1. Edukimi i pacientit. Pacientët duhen udhëzuar në mënyrë të saktë përsa i përket matjes dhe administrimit të dozës së duhur të semaglutidit. Është shumë e rëndësishme që ata të kuptojnë përdorimin e shiringës dhe të interpretojnë siç duhet njësitë e matjes.
2. Përmasat e shiringës. Operatorët shëndetësorë dhe farmacistët duhet t'u japin pacientëve shiringa në përmasat e përshtatshme për dozën e parashikuar, duke u siguruar që ata janë në gjendje ta matin me saktësi.
3. Përqendrimet e ndryshme. Duke qenë se produktet e personalizuara mund të kenë përqendrime të ndryshme, mjekët duhet të jenë veçanërisht të kujdesshëm në momentin e përshkrimit, apo administrimit të semaglutidit. Në rast dyshimi, duhet të kontaktohet farmacisti për konfirmimin e dozës së duhur.