tet182019
Eukalipti. Si përgatitet formula dekongjestive në formë pikash nazale?
Eukalipti është vetëm një nga përbërësit e një formulimi që mund të përgatitet sipas farmakopesë XII. Përbërësit e tjerë të këtij formulimi dekongjestiv janë kamfuri, timoli dhe mentoli. Kemi folur edhe më parë për vetitë efikase dekongjestive dhe mukolitike të eukaliptit dhe mentolit. Kamfuri është një substancë që nxirret kryesisht nga një specie e gjinisë Cinnamomum (e njëjtë me kanellën): C. camphora dhe nga gjigandi aromatik Bormeo Dryobalanops.
Është një substancë në formë dylli, e bardhë ose transparente, me aromë të fortë tipike. Mund të prodhohet në mënyrë sintetike, nga vaji i terpentinës. Përdorimi i tij, përveçse në traditën popullore për të mbajtur insektet larg veshjeve, ka konotacione fetare në vendet ku pemët nga të cilat nxirret, janë vendase. Përdoret si lëng për balsamosje, por jo vetëm kaq. Në Indi përdoret gjithashtu edhe si përbërës në disa receta. Timoli është një fenol monoterpenik, i pranishëm në sasi të bollshme në bimë të gjinisë Thymus, nga e cila merr emrin dhe që ndihmon në ndërtimin e aromës. Timoli është shumë i studiuar për efektet e tij antimikrobike, si dhe për vetitë antioksidante.
Timoli dhe karvakroli (një përbërës tjetër i vajit esencial të trumzës) reduktojnë rezistencën bakteriale ndaj antibiotikëve përmes një efekti sinergjik. Ky aktivitet antibakterial, kundër shtameve të tilla si Aeromonas hydrofilae Staphylococcus aureus shkaktohet nga frenimi i rritjes e prodhimit, si edhe nga rënia e përthithjes qelizore të glukozës.
Në formulimin e mëposhtëm, këta përbërës janë përzier me vaj ulliri për të krijuar pika nazale. Prandaj është e përshtatshme të identifikohet ena e duhur që të bëjë të mundur aplikimin praktik në zgavrën e hundës. Pikat duhen kontrolluar nga pikëpamja cilësore për shkak të mungesës së patretshmërisë, uniformitetit të dozimit, sasisë dhe ngushtësisë së paketimit.
Shembull formulimi
Materialet: provëz, shufër qelqi, peshore
Esencë eukalipti 1,5 g
Kamforë racemike 0,2 g
Mentol racemike 0,2 g
Timol 50 mg
Vaj ulliri i virgjër (sa të nevojitet) për 100 g
Përgatitja:
Përzieni mentolin racemik, kamfurin racemik dhe timolin; shtoni përzierjen e esencës së eukaliptit dhe arrini peshën e duhur me vajin e ullirit. Ambalazhojeni në enë qelqi të errët, të mbrojtur nga drita. Udhëzimet kryesore për përdorim kanë të bëjnë me ndjeshmërinë e mundshme individuale ndaj përbërësve të veçantë, me vëmendje të posaçme në rastet e subjekteve astmatike.
Luca Guizzon, ekspert në fitoterapi
Burimet:
Farmacopea XII Fitoterapia