Mungesa e akteve nënligjore për zbatimin e ligjit të ri në rregullimin e tregut farmaceutik

tags: LIGJI I RI I BARNAVE, MSH, SHPF, AKBPM

Artikuj lidhur

14-10-2014 | Deklaratë për shtyp nga SHPF

03-05-2023 | Agjencia e Barnave dhe e Pajisjeve Mjekësore. Shërbimi online lehtëson distributorët farmaceutikë

23-02-2023 | EMA nis të hetojë barnat që përmbajnë pseudofedrinë. Agjencia e Barnave në Shqipëri: Nuk kemi pasur raportime. Presim vendimet e EMA-s

Dje më datë 13 tetor, në Hotel Sheraton u mbajt Forumi i biznesit me temë "Tregu i barnave në Shqipëri" organizuar nga Dhoma Amerikane e Tregëtisë dhe Këshilli Ekonomik Kombëtar, me pjesëmarrjen e Shoqatës së Përfaqësive Farmaceutike, fokusi i të cilës ishte drejtuar në funksionin e Agjensisë së Barnave.

Fjalën e hapjes e mbajti Z. Genc Boga, sekretar i Përgjithshëm i Këshillit Ekonomik Kombëtar i cili pasi përgëzoi takimin ia la fjalën përfaqësuesit të Dhomës Amerikane të Tregtisë, Z. Mark Crawford dhe Ministrit të Shëndetësisë, Z. Beqaj.

Z. Ministër vlerësoi barnat dhe kujdesin shëndetësor si një e mirë publike, përmendi eleminimin e monopoleve dhe si rjedhojë nxitjen e konkurencës së ndershme, punën që po bëhet për mbulimin shëndetësor universal. Theksoi si çështje me rëndësi çmimin e barnave që synohet të mos paguhen më shtrejtë se në vendet e origjinës, një treg barnash prej 110 milionë euro. Shprehu shqetësimin e tij kryesor rreth furnizimit me barna të Qëndrave Spitalore. Në lidhje me ish QKKB nënvizoi se e trashëguan në gjëndje skandaloze për shkak të problematikave në ligj, tepër regjistrime barnash të lëna përgjysëm. Gjatë kësaj kohe është punuar seriozisht për rritjen e kësaj Agjensie, është shtuar numri i produkteve të regjistruara, përmendi emetimin e 10% më tepër pullave të reja. Vlerësoi përpjekjet e hershme të kësaj Ministrie për krijimin dhe miratimin e Ligjit të ri të barnave dhe punën që po bëhet për të rregulluar zbatimin e tij. Duke qënë se jemi në muajin e kancerit të gjirit, Z.Beqaj akuzoi kompanitë farmaceutike për neglizhencën e treguar në proçesin e sensibilizimit.

Kreui SHPF si dhe përfaqësues i kompanisë Glaxo, Z. Roland Xhafaj, nisi diskutimin e tij duke përgëzuar punën e kësaj Ministrie për Ligjin e ri të barnave, si një hap përpara drejt përmirësimit të standarteve. "Filtrat e vendosur që në fillim kanë kufizuar ato kompani që kanë qënë njolla e sistemit". Shprehu gadishmërinë e kësaj Shoqate për bashkëpunim por theksoi nevojën e domosdoshme të nxjerrjes së akteve nën ligjore për zbatimin e këtij ligji të ri për rregullimin e tregut.

Ndër çështjet problematike që ngriti Z. Roland gjatë fjalës së tij përmendim:-Duke qënë se jemi në periudhën e vaksinimit kundër gripit, vetëm javën e kaluar u bë e mundur hyrja e vaksinave. -Nuk kuptohet kujt organizatave i referohet kjo Agjensi. -Agjensia ndryshe nga simotrat në Europë nuk verifikon por bazohet në çertifikata duke vonuar në kohë proçesin. -Nëse ka trajtim të barabartë të aktorëve. -Përmendi tepër problematik proçesin e Riregjistrimit, jo 100% transparent dhe jo i qartë. Shpesh herë dokumentacioni konsiderohet jo i plotë dhe kështu kërkesa refuzohet por pa dhënë sqarime zyrtare në mënyrë të tillë që kompanitë ta zgjidhin. -Problemi i çertifikatës së eksportit CPP.

Në lidhje më këto problematika edhe Z. Genc Boga, kërkoi sqarim nga AKBPM si dhe theksoi situatën absurde ku është futur tregu farmaceutik i cili tashmë po funksionon me ligjin e ri dhe me rregulloret e vjetra, gjë që le vend për abuzim.

-U diskutua gjatë për proçesin e Variacionit, ku Z. Sazan Celiku përfaqësues i kompanisë farmaceutike Janssen Cilag, gjithashtu përfaqësuesja e Bayer përmendën shembuj konkretë të bllokimeve të barnave si rezultat i mos miratimit të Variacionit, ndryshime jo në përbërje të barit por në formën e jashtme të kutisë, karakteristika jo thelbësore që çojnë në sekuestrimin e barit.

Në diskutim ndërhyri dhe Z. Nexhat Sheqi, pronar i kompanise importuese Rejsi farma. Në fjalën e tij ai theksoi vështirësitë që është i detyruar të përballojë një kompani importuese. Sipas tij për të marrë një autorizim importi, një depo importuese duhet të shkojë deri në shtatë herë në AKBPM.

Z. Roland nuk la pa përmendur dhe rinovimin e GMP që po sjell tepër vonesa në treg, shumë proçese burokratike jo të qarta që po vështirësojnë punën e tyre.

Gjatë ndërhyrjeve të tij Z. Ministër e vlerësoi punën e Agjensisë që merret me studimin e letrave sepse ndryshe do të rritej shkalla e subjektivizmit, proçesi i miratimit të Variacionit sipas tij nuk mund të mbarojë në pak ditë "nuk mund të përcaktojmë sa i vogël apo sa i madh është ndryshimi, kompania mos importojë pa miratimin e Variacionit dhe malli të ndalohet që në hyrje nga Inspektorët". Gjithashtu rinovimi i GMP sipas tij është tepër i rëndësishëm. "Deri në 3 mars do ti kemi këto probleme sa të hyjnë në fuqi aktet nënligjore për zbatimin e ligjit të ri".

Takimi u mbyll me premtimin e organizimit të një tryeze tjetër ku të vazhdohet dialogu për të debatuar problematikat dhe për të ofruar zgjidhje afatgjata për një sektor kaq jetik siç është ai i farmaceutikës.