OBSH: Shqiptarët, jetë më të gjatë dhe më të shëndetshme se britanikët e varfër 

Një përfundim i tillë bazohet në parametrat e jetëgjatësisë dhe vdekshmërisë aktuale, ku një bebe mashkull që jeton në një zonë të varfër të Anglisë ka një jetëgjatësi mesatare prej 74.1 vitesh, nga të cilat vetëm 52.2 në shëndet të mirë. Ndërsa një bebe e lindur në Shqipëri me të njëjtat karakteristika parashikohet të ketë 64 vite jetë të shëndetshme. E njëjta gjë ndodh edhe me bebet e seksit femër. Ato të lindura në lagjet e varfra të shtetit anglez do të kenë mesatarisht 52.4 vite jetë të shëndetshme në krahasim me bebet e lindura në të njëjtën periudhë në Shqipëri të cilat parashikohet të jetojnë 66 vite jetë të shëndetshme.

Ndonëse Anglia ka një tregues të përgjithshëm të nivelit të jetesës më të lartë se Shqipëria studimi i fundit nga Zyra Kombëtare e Statistikave në Angli tregon se ka një pabarazi drastike midis qytetarëve anglezë që jetojnë në zonat e varfra dhe atyre që jetojnë në zonat e pasura.