kor262021
Vaksinat anti-Covid. EMA përditëson broshurën e Janssenit. Një ndër efektet e rralla: Sindroma Guillain Barré
Sindroma Guillain-Barré (GBS) do të shtohet në listën e efekteve anësore të vaksinës Janssen Covid-19 me një frekuencë shumë të rrallë dhe një paralajmërim do të përfshihet në informacionin e produktit për të rritur ndërgjegjësimin midis profesionistëve të shëndetësisë dhe atyre që marrin vaksinën. Kjo u bë e ditur nga EMA.
GBS-ja, shpjegon EMA, është një çrregullim i rrallë neurologjik në të cilin sistemi imunitar i trupit dëmton qelizat nervore, duke shkaktuar dhimbje, mpirje dhe dobësi të muskujve që mund të përparojnë, në raste të rënda, deri në paralizë. Shumica e njerëzve shërohen plotësisht. Megjithëse rastet pas vaksinimit me vaksinën Janssen Covid-19 janë raportuar shumë rrallë, profesionistët e shëndetësisë duhet t'iu kushtojnë vëmendje shenjave dhe simptomave të GBS-së, duke marrë parasysh ashpërsinë e kësaj gjendjeje, për të bërë të mundur diagnostikimin e hershëm, kujdesin mbështetës dhe trajtimin. EMA këshillon njerëzit e vaksinuar të kërkojnë ndihmë të menjëhershme mjekësore nëse zhvillojnë shenja dhe simptoma të ngjashme me ato të GBS-së, siç janë dobësia në ekstremitete, shikimi i dyfishtë ose vështirësia për të lëvizur sytë.
Simptomat që duhen monitoruar dhe udhëzimet për operatorët
Në veçanti, Agjencia Evropiane informon njerëzit e vaksinuar se sindroma ka ndodhur shumë rrallë te njerëzit që kanë marrë vaksinën Janssen Covid-19 dhe se shumica e njerëzve shërohen plotësisht edhe nga simptomat më të rënda, ndërsa disa mund të vazhdojnë të kenë njëfarë dobësie. Por, duhet të kërkoni kujdes të menjëhershëm mjekësor nëse shfaqni simptoma pasi të jeni vaksinuar me vaksinën Janssen Covid-19. Ja, simptomat të cilave u duhet kushtuar vëmendje:
- shikim i dyfishtë ose vështirësi në lëvizjen e syve;
- vështirësi në gëlltitje, të folur ose në përtypje;
- probleme të koordinimit dhe paqëndrueshmërisë;
- vështirësi në të ecur;
- ndjesi shpimi gjilpërash në duar dhe këmbë;
- dobësi në gjymtyrë, gjoks ose fytyrë;
- probleme me kontrollin e fshikëzës dhe funksionimin e zorrëve.
Informacion për profesionistët e shëndetësisë
GBS-ja do të shtohet si një efekt anësor shumë i rrallë në Informacionin e Produktit për vaksinën Covid-19 Janssen (seksioni 4.8). Edhe seksioni 4.4 do të përditësohet me një paralajmërim. Është e nevojshme të këshillohen individët që marrin vaksinën Janssen Covid-19 që të kërkojnë kujdes të menjëhershëm mjekësor nëse zhvillojnë simptoma të GBS-së. Kushtojuni vëmendje shenjave dhe simptomave të GBS-së për të vendosur diagnozën e saktë, filloni trajtimin e duhur mbështetës dhe përjashtoni shkaqet e tjera.