jan132015

AIFA tërheq Augmentin 12 të importuar nga Rumania

Në Itali që në muajin dhjetor Agjencia Italiane e Barnave (AIFA) ka urdhëruar bllokimin dhe tërheqjen e loteve të antibiotikut Augmentin 12, tableta të veshura 875 + 125 mg, të hyra në këtë vend nga "importi paralel" me fletë ilustuese dhe etiketa në gjuhën rumune.
Ndonëse informacioni ka mbërritur te distributorët dhe farmacitë, shoqata italiane e konsumatorëve "Federconsumatori", në një komunikatë nënvizon se nuk janë paralajmëruar qytetarët. Dhe shton: "Përballë parregullsive në prodhimin e barnave të destinuara për konsum të gjerë, habit fakti që urdhrin e datës 5 dhjetor 2014 i cili detyroi bllokimin e blerjeve, e mësojmë vetëm këto ditë dhe akoma më shumë që nuk iu janë dhënë pacientëve udhëzimet për të mos e përdorur barin e ardhur nga Rumania".
Komunikata e AIFA-s tregon se tërheqja i përket loteve AIP n. 039785047 me etiketa të brendshme në gjuhën rumune dhe "është vendosur pas sinjalizimeve nga kompanitë Glaxo dhe Medifarm". Sipas "Federconsumatori" alarmi që ka detyruar farmacitë të bllokojnë shitjen dhe përdorimin e antibiotikut të njohur ka injoruar në mënyrë të pashpjegueshme qytetarët. Ata që kanë blerë para tërheqjes produktet e dyshimta nuk janë informuar fare në lidhje me risqet e përdorimit të tyre. "Është e natyrshme të pyesim: Përse qytetarët nuk u paralajmëruan? Përse nuk u ftuan të kontrollojnë paketimin e produktit? Sqarimet janë më se të nevojshme, po ashtu edhe përpjekjet maksimale për të shmangur ekspozimin e publikut ndaj komplikimeve".