jan212015

Ambroksoli dhe reaksionet e rënda alergjike

Komiteti i Vlerësimit të Risqeve për Farmakovigjilencën (PRAC) i EMA-s ka përfunduar rivlerësimin e sigurisë së barnave që përmbajnë Ambroksol. Autoritetet belge ishin shprehur kundër në prill të 2014-s për përdorimin e tij te fëmijët pas disa episodeve të mbindjeshmërisë dhe ia lanë vendimin përfundimtar PRAC-it. Ambroksoli, i cili vepron lokalisht si ekspektorant duke përmirësuar pastrimin e mukusit dhe dispnean, është midis barnave më të përdorura për trajtimin e çrregullimeve të frymëmarrjes dhe bronkitit obstruktiv. PRAC, duke e konsideruar  të ulët rrezikun për reaksione të rënda alergjike, ka rekomanduar përditësimin e informacioneve të lidhura me efektet negative të Ambroksolit dhe Bromheksinës, në të cilën ai është edhe metaboliti kryesor, duke përfshirë edhe manifestimet në lëkurë (të trajtuara në literaturë) si eritema shumëformëshe dhe sindroma Stevens-Johnson. Kjo e fundit është forma më e rëndë, e karakterizuar nga prania e flluskave në mukozën orale, faring, në pjesën ano-gjenitale dhe e shoqëruar me ethe dhe vështirësi në ushqyerje ose në mbylljen e gojës. Bazuar në të dhënat e mbledhura, PRAC në fund vendosi të zgjerojë listën e risqeve me këshillën për të ndaluar trajtimin me Ambroksol në rast të shfaqjes së simptomave në lëkurë. Po ashtu farmacistët duhet t'i kushtojnë vëmendje të veçantë reaksioneve negative të barnave në kombinim me Ambroksolin.