jan242015
Barna të reja për artritin psoriatik, hepatitin C, obezitetin dhe gastritin
Komisioni Evropian ka miratuar Apremilastin (Otezla nga Celgene International), mjekim oral për trajtimin e pacientëve me psoriasis dhe me artrit psoriatik. Bëhet fjalë për një inhibitor të fosfodiesterazës 4 (PDE4) të autorizuar me dy indikacione: 1) trajtimin e pacientëve të rritur me psoriasis të moderuar ose të rëndë, të cilët nuk i janë përgjigjur ose kanë rezultuar intolerantë ndaj trajtimeve të tjera sistemike si ciklosporina, metotreksati ose psoraleni dhe drita ultravjollcë-A. 2) Treguesi i dytë lidhet me përdorimin e barit, i vetëm ose në kombinim me një bar DMARD (Disease modifying antirheumatic drugs) në artritin psoriatik te të rriturit me përgjigje jo adekuate ose intolerancë ndaj ciklit të parë të trajtimit me një bar DMARD.
Autorizim nga EMA edhe për regjimin oral të përbërë nga Ombitasvir /Paritaprevir / Ritonavir (Viekirax nga AbbVie), si dhe për Dasabuvir (Exviera nga AbbVie) për pacientët me hepatit kronik C, për pacientët me infeksion HCV / HIV-1 dhe për ata që i janë nënshtruar transplantimit hepatik. Trajtimi është miratuar për përdorim me ose pa Ribavirinën (RBV) te pacientët e prekur nga infeksioni i hepatit kronik C (HCV) me gjenotipin 1 (GT1), duke përfshirë ata me cerozë hepatike të kompensuar, me infeksion HIV-1, si dhe subjektet që marrin terapi zëvendësuese me opioid dhe ata që kanë kryer një transplant hepatik.
Dritë jeshile edhe për Ramucirumab-in (nga kompania Lilly), në kombinim me Paclitaxel, për trajtimin e pacientëve të rritur me adenokarcinomë gastroesofageale apo në fazë gastrike të avancuar, pas kimioterapisë. Dhe si monoterapi në këtë indikacion te pacientët për të cilin trajtimi në kombinim me Paclitaxel-in nuk është i përshtatshëm. Ramucirumab-i është një antagonist i receptorit 2 për VEGF të përfshirë në proceset e angiogjenezës.
Në Shtetet e Bashkuara, FDA ka aprovuar Liraglutine (Saxenda nga Novo Nordisk) për menaxhimin kronik të peshës. Bari antagonist i GLP-1 është një bashkëshoqërues i dietës ushqimore dhe ushtrimeve fizike për rënien në peshë te të rriturit obezë (me BMI të barabartë ose më të madhe se 30 kg/m2) ose në mbipeshë (me BMI të barabartë me ose më e madhe se 27 kg/m2). Është e rëndësishme të theksohet se bari fillon të veprojë në nivele optimale pas disa javësh dhe jo menjëherë. Pacientët që përdorin Saxenda duhet të vlerësohen pas 16 javësh për të përcaktuar nëse trajtimi është duke funksionuar. Nëse gjatë kësaj kohe, një pacient nuk ka humbur të paktën 4% të peshës fillestare trupore, administrimi i barit duhet të ndalet sepse nuk është efikas te ai pacient.