mar132018
Bashkimi i triptaneve me antidepresivët, nuk e shton rrezikun e sindromës serotoninergjike
Administrata e Barnave dhe e Ushqimit në SHBA, duhet ta rishikojë vendimin e saj për moslejimin e përshkrimit të njëkohshëm të triptaneve dhe antidepresivëve. Kështu, pacientëve nuk do t'u duhet të heqin dorë nga menaxhimi i një patologjie, për të trajtuar një tjetër. Këto janë konkluzionet e një studimi të publikuar në "Jama Neurology".
"Në vitin 2006, FDA-ja ka bërë të ditur një njoftim në lidhje me rreziqet e sindromës serotoninergjike të shkaktuar nga përdorimi i njëkohshëm i triptaneve dhe i antidepresivëve SSRI (frenues përzgjedhës të ripërthithjes së serotoninës) ose SNRI (frenues përzgjedhës të ripërthithjes së norepinefrinës), por rreziku real i sindromës serotoninergjike te këta pacientë mbetet i panjohur", shpjegon Yulia Orlova (Spitali i Bostonit), autore kryesore e studimit. Për të vlerësuar këtë rrezik, kërkuesit kanë përdorur të dhënat e kartelave klinike elektronike të Partner Research Data Registry (RPDR) për të identifikuar pacientët që ishin diagnostikuar me një diagnozë të ngjashme me sindromën serotoninergjike dhe që ishin trajtuar me triptane dhe me antidepresivë SSRI ose SNRI në zonën e Bostonit, nga 1 janari 2001, deri në 31 dhjetor 2014. Kërkimi mbi RPDR-në ka treguar se 47.968 pacientëve u ishin përshkruar triptane gjatë periudhës 14-vjeçare të studimit.
Një numër i përgjithshëm prej 19.017 pacientësh kishte marrë si përshkrim triptane dhe antidepresivë në të njëjtën kohë. Te këta, sindroma serotoninergjike është dyshuar në 17 pacientë, por vetëm dy prej tyre janë klasifikuar të prekur prej saj, ndërsa pesë pacientë vetëm janë dyshuar si të prekur nga sindroma. Sasia e pacientëve që merrnin triptane dhe që trajtoheshin edhe me një antidepresiv SSRI apo SNRI, ka qenë relativisht e qëndrueshme gjatë studimit dhe varionte nga 21% - 29%. Rreziku i sindromës serotoninergjike, të lidhur me përdorimin e njëkohshëm të triptaneve dhe të SSRI-së ose SNRI-së është i ulët, me një incidencë të vlerësuar të sindromës që varionte nga 0 në 4 për 10.000 vjet/persona ekspozim.
Përshkrimi i njëkohshëm i këtyre barnave ka rezultuar i zakonshëm dhe nuk është pakësuar pas njoftimit nga FDA-ja në vitin 2006. "Rezultatet tona vënë në dyshim vlefshmërinë e vendimit të FDA-së dhe sugjerojnë se ky vendim duhet rishikuar", përfundojnë autorët.
JAMA Neurol. 2018 Feb 26. doi: 10.1001/jamaneurol.2017.5144
https://www.ncbi.nlm.nih.gov/pubmed/29482205