kor272018
Endometrioza. FDA-ja aprovon opsionin e ri terapeutik kundër dhimbjeve
FDA-ja ka miratuar me procedura të përshpejtuara elagolix-in, që në më shumë se një dekadë, është opsioni i parë i ri terapeutik për trajtimin e dhimbjeve të lidhura me endometriozën. Bari, i cili do të tregtohet nën markën Orilissa, prodhohet nga AbbVie në bashkëpunim me Neurocrine Biosciences dhe merret si pilulë e përditshme. Elagolix-i është një antagonist oral i GnRH-së, hormonit që lëshohet nga gonadotropinat dhe është aprovuar për trajtimin e dhimbjes mesatare/të rëndë, shkaktuar nga endometrioza.
Kjo sëmundje prek një në dhjetë gra të moshës riprodhuese dhe shoqërohet me simptoma të dhimbshme, që mund të jetë edhe shumë dobësuese. Kohëzgjatja e rekomanduar e përdorimit të medikamentit është 24 muaj për dozën 150 mg një herë në ditë dhe 6 muaj për dozën 200 mg dy herë në ditë, pasi ajo mund të shkaktojë ulje të dendësisë minerale të kockave.
Humbja e densitetit kockor është më e madhe me rritjen e kohëzgjatjes së përdorimit dhe mund të mos jetë krejtësisht e kthyeshme pas ndërprerjes së trajtimit. Për gratë me dëmtim të moderuar hepatik, doza e rekomanduar është 150 mg një herë në ditë deri në gjashtë muaj. Në dy studime klinike të fazës së tretë, që përfshinin pothuajse 1.700 pacientë, elagolix-i shfaqi superioritet mbi placebon në reduktimin e tre llojeve të dhimbjeve të lidhura me endometriozën: dhimbje pelvike menstruale e përditshme, dhimbje pelvike jo menstruale dhe marrëdhënie të dhimbshme.