maj132019
EMA. 84 produkte të reja, të aprovuara në vitin 2018. Me Brexit-in, rreziqe afatgjata
Agjencia Europiane e Barnave (EMA) ka autorizuar në vitin 2018, 84 barna, përfshi 42 substanca të reja aktive (kryesisht kundër kancerit, infeksioneve, sëmundjeve neurologjike), 21 barna jetime dhe 3 terapi të avancuara, dy kundër formave të tumorit dhe një për patologjitë oftalmologjike. Rruga u është hapur edhe 10 barnave veterinare. Kjo është sinteza e raportit përfundimtar të aktivitetit të EMA-s, tashmë e transferuar nga Londra në Amsterdam, për shkak të Brexit-it.
"Jam shumë i lumtur që po konfirmoj se për momentin, nuk kemi pësuar asnjë goditje, nënvizon drejtori ekzekutiv i EMA-s, Guido Rasi, duke folur për "transferimin" e agjencisë. Vazhdojmë të punojmë, por nuk mund të përjashtojmë një ndikim afatgjatë në këtë ent, nëse nuk angazhohemi për investimin e të gjitha burimeve të nevojshme në të ardhmen.
Kanë qenë në fakt të nevojshme shkurtimet e disa aktiviteteve, të tilla si pezullimi i publikimit proaktiv të të dhënave klinike dhe, aktualisht, vonesat në përditësimet e nevojshme të infrastrukturës sonë IT, që janë shtylla kurrizore e bashkëpunimit tonë në nivel europian. Nuk mund të mohohet se këto shkurtime mund të kenë penguar, më së paku në terma afatshkurtër, kapacitetin e kësaj agjencie për të ecur në një hap me zhvillimet shkencore e normative dhe për të mbështetur kërkimin dhe zhvillimin e barnave në Europë".