jan272020
Farmakovigjilenca. FDA-ja njofton se lorcaserina mund të jetë e rrezikshme
Administrata Amerikane e Ushqimit dhe e Barnave (FDA) ka njoftuar siguri të dobët të lorcaserinës, një antagonist të receptorit të serotoninës 2C, që tregtohet si Belviq dhe Belviq XR, medikament i përdorur për menaxhimin e peshës. Ndërhyrja e organit rregullator ishte e domosdoshme pas rezultateve të një studimi klinik i cili, ndërsa bënte vlerësimin e sigurisë së barit të prodhuar nga Arena Pharmaceuticals dhe shpërndarë nga Eisai, tregoi një rritje të mundshme të rrezikut të kancerit.
"Për momentin, shkaktueshmëria është e pasigurt dhe ne nuk mund të arrijmë në përfundimin se lorcaserina kontribuon në rritjen e rrezikut për kancer. Sidoqoftë, duhej ta ndërgjegjësonim publikun për këtë rrezik të mundshëm", shpjegon agjencia në një njoftim për shtyp. FDA-ja u këshillon profesionistëve të shëndetit të vlerësojnë nëse përfitimet e marrjes së lorcaserinës e tejkalojnë rrezikun e mundshëm për kancer dhe ta diskutojnë çështjen me pacientët që aktualisht po marrin medikamentin. "Ne po vazhdojmë vlerësimin e rezultateve të eksperimentimit klinik dhe do t'i komunikojmë konkluzionet e rekomandimet tona përfundimtare kur të kemi përfunduar rishikimin", vazhdon FDA-ja.
Lorcaserina u aprovua nga FDA-ja në vitin 2012 në një dozë prej 20 mg një herë në ditë, si shtesë e dietës hipokalorike dhe aktivitetit të shtuar fizik, për të përmirësuar rënien në peshë te të rriturit obezë ose në mbipeshë, me të paktën një problem mjekësor që lidhet me peshën, të tillë si hipertensioni, diabeti i tipit 2 ose dislipidemia.
Në korrik 2016, agjencia miratoi gjithashtu një version të barit me lëshim të zgjatur që do të merret një herë në ditë. Efektet e kundërta më të shpeshta të konstatuara te pacientët pa diabet ishin dhimbja e kokës, marramendja, lodhja, nauzea, thatësia e gojës dhe kapsllëku, ndërsa tek ata me diabet, është shfaqur hipoglicemi, dhimbje koke, dhimbje shpine, kollë dhe lodhje. Trajtimi kundërindikohet gjatë shtatzënisë.
Fda - Medical Product Safety Information
https://www.fda.gov/safety/medical-product-safety-information/belviq-belviq-xr-lorcaserin-drug-safety-communication-due-possible-increased-risk-cancer