mar162023
Statinat që reduktojnë rrezikun e insuficiencës kardiake te pacientët tumoralë
Një studim i ri amerikan i kryer nga studiuesit e Universitetit të Pensilvanisë në Filadelfia, ka treguar se atorvastatina, një medikament që i përket familjes së statinave dhe përdoret gjerësisht për uljen e kolesterolit mund të zvogëlojë rrezikun për insuficiencë kardiake te pacientët me limfomë që marrin trajtime me bazë antracikline.
Antraciklinat janë barna që përdoren për trajtimin e shumë llojeve të kancerit të cilat gjithashtu rrisin rrezikun për insuficiencë kardiake te pacientët që i marrin ato.
Studimi me 300 pacientë
Në studimin njëvjeçar morën pjesë 300 pacientë që merrnin medikamente me përmbajtje antracikline, të cilët u përzgjodhën në mënyrë rastësore për të marrë atorvastatinë ose placebo. Rezultatet treguan se përqindja e pacientëve që zhvilluan insuficiencë kardiake ishte më e ulët midis atyre që morën atorvastatinë (9%) sesa midis atyre që morën placebo (22%).
Pas një viti ndjekje, studiuesit arritën të gjenin një ndryshim të vogël midis dy grupeve, në mesin e pacientëve me zemër të dobësuar që nga fillimi i studimit, vetëm 13% e atyre që merrnin atorvastatinë ishin të rrezikuar për të pësuar insuficiencë kardiake, krahasuar me 29% të pacientëve që merrnin placebo.
"Pacientët me limfomë që trajtohen me antraciklinë dhe janë në rrezik të lartë për mosfunksionim ose insuficiencë kardiake do të përfitonin shumë nga terapia me statina", thotë bashkautorja Marielle Scherrer-Crosbie nga Universiteti i Pensilvanisë në Filadelfia.
Studiuesit vunë në dukje gjithashtu se ata nuk mundën të vlerësonin numrin e saktë të pacientëve që pësuan insuficiencë kardiake, një gjendje në të cilën zemra bëhet shumë e dobët për të pompuar gjakun në mënyrë efikase.
Cristoforo Zervos