jan182018

Aprovohet ocrelizumab-i. Një shpresë e re për sklerozën multiple recidivante e progresive

Bashkimi Europian ka dhënë autorizimin për nxjerrjen në treg të ocrelizumab-it për trajtimin e pacientëve me forma recidivante aktive të sklerozës multiple, me karakteristika klinike ose radiologjike, ashtu si edhe për pacientët e prekur nga skleroza multiple kryesisht progresive në fazë fillestare, në drejtim të kohëzgjatjes së sëmundjes dhe nivelit të paaftësisë dhe me karakteristika radiologjike tipike të aktivitetit inflamator. Këtë e ka deklaruar Roche, duke nënvizuar se në Europë, skleroza multiple (SM), ka prekur afërsisht 700.000 vetë, nga të cilët, rreth 96.000 kanë shfaqur forma kryesisht progresive.
Sa i përket diagnozës, pjesa më e madhe e subjekteve të prekura nga SM-ja shfaqin një formë recidivante (SMR) ose kryesisht progresive (SMPP).
"Aprovimi i sotshëm i ocrelizumab-it nga Bashkimi Europian është një lajm i jashtëzakonshëm. Ky bar mund të përfaqësojë një kthesë të vërtetë në konceptimin dhe në trajtimin aktual të sklerozës multiple", konfirmon Gianluigi Mancardi, profesor i neurologjisë dhe president i Shoqatës Italiane të Neurologjisë.
"Para  ocrelizumab-it, njerëzit e prekur nga skleroza kryesisht progresive, të cilëve shpesh u duhej të përballeshin me kufizime të rëndësishme në jetën e përditshme për shkak të sëmundjes, nuk kishin në dorë një trajtim të aprovuar, që mund të ngadalësonte përparimin e sëmundjes. Më së shumti, të prekurit nga forma recidivante të SM-së të trajtuara me barna modifikuese të sëmundjes, kanë qenë të detyruar të bënin një kompromis duke zgjedhur mes sigurisë dhe efikasitetit. Ocrelizumab-i merret çdo gjashtë muaj dhe nuk parashikon monitorime shtesë. Shpresojmë që kjo t'u japë mundësi pacientëve ta jetojnë jetën e tyre pa menduar për trajtimin çdo ditë e çdo javë".
"Për qytetarët europianë që bashkëjetojnë me sklerozën multiple, aprovimi i sotshëm i ocrelizumab-it nga ana e BE-së paraqet një hap të madh përpara në trajtimin e sëmundjes", ka deklaruar Sandra Horning, shefe e Zhvillimit të Produktit Botëror në Roche.
"Ocrelizumab-i është bari i parë që ka marrë aprovimin për trajtimin e SN-së kryesisht progresive, një formë dobësuese në të cilën paaftësia e pakthyeshme vjen shumë shpejt. Ky bar na jep një mundësi terapeutike tepër efikase për njerëzit me forma recidivante të sklerozës multiple. Jemi të gatshëm të bashkëpunojmë me shtetet anëtare për të garantuar sa më shpejt që personat e prekr nga SMR-ja dhe SMPP-ja të kenë mundësi të përfitojnë nga efektet pozitive të ocrelizumab-it".
Efektet e padëshiruara më të shpeshta, të lidhura me ocrelizumab-in në të gjitha studimet e fazës III kanë qenë reaksionet dhe infeksionet e rrugëve të sipërme të frymëmarrjes, më së shumti me intensitet nga i lehtë në të moderuar.
Përdorimi i ocrelizumab-it është aprovuar në vende të ndryshme në Amerikën e Veriut dhe të Jugut, në Lindjen e mesme dhe në Europën lindore, ashtu si edhe në Australi dhe në Zvicër. Deri më sot, janë trajtuar me ocrelizumab rreth 30.000 vetë të prekur nga skleroza multiple.