kor82024
Suplementet dhe shtatzënia. Zinku dhe kalciumi reduktojnë rrezikun për hipertension
Gratë, të cilat marrin sasi më të mëdha kalciumi dhe zinku 3 muaj para ngjizjes, kanë dukshëm më pak probabilitet për të vuajtur nga çrregullime të lidhura me hipertensionin gjatë shtatzënisë, sipas një studimi të prezantuar në Nutrition 2024, rezultatet e të cilit evidentojnë rëndësinë e ushqyerjes, përpara ngjizjes e jo vetëm gjatë shtatzënisë.
Çrregullimet e lidhura me hipertensionin në shtatzëni
Hipertensioni është një nga çrregullimet më të zakonshme në shtatzëni dhe mund të shkaktojë dëmtime, si për nënën, ashtu edhe për fetusin në zhvillim. Në Itali është vlerësuar se gati një shtatzëni nga dhjetë, ndërlikohet nga hipertensioni paraekszistues, apo i shfaqur gjatë shtatzënisë. Në veçanti, incidenca e preeklampsisë, komplikacioni më i rëndë i lidhur me hipertensionin në shtatzëni, nuk vërehet, por do të ishte rreth 5%. Kjo e bën hipertensionin një nga patologjitë që duhet të parandalohet dhe monitorohet më me kujdes gjatë shtatzënisë. Përveç kësaj, hipertensioni që shfaqet gjatë shtatzënisë përbën një faktor rreziku të pavarur për zhvillimin e hipertensionit arterial të qëndrueshëm, sëmundjeve kardiovaskulare dhe vdekjes nga shkaqe kardiovaskulare me kalimin e kohës.
Kujdesi me ushqyerjen
Ndërsa shumë gra përqendrohen te ushqimi pasi mbeten shtatzënë, studiuesit amerikanë argumentojnë se statusi ushqimor përpara ngjizjes është po aq i rëndësishëm, pasi shpesh mund të duhet kohë që trupi të korrigjojë mangësitë ose çekuilibrat.
Për studimin, ekipi vlerësoi mundësinë e parandalimit të çrregullimeve të lidhura me hipertensionin në dy studime - një mbi kalciumin dhe një mbi zinkun -, duke mbledhur të dhëna nga mbi 7,700 gra shtatzëna. Pasi morën parasysh faktorët demografikë, stilin e jetës dhe shëndetin, të cilat lidheshin me rrezikun e hipertensionit, studiuesit analizuan lidhjen midis marrjes së dy elementëve para ngjizjes dhe shkallës së çrregullimeve hipertensive në shtatzëni.
Rezultatet
Rezultoi se gratë që kishin marrë më shumë kalcium përpara ngjizjes kishin 24% më pak probabilitet për të zhvilluar çrregullime të lidhura me hipertensionin gjatë shtatzënisë, krahasuar me ato që kishin marrë më pak. Ndërsa, përsa i përket zinkut, gratë që kishin marrë më shumë zink përpara ngjizjes, kishin 38% më pak probabilitet për të zhvilluar çrregullime hipertensive gjatë shtatzënisë, krahasuar me ato që kishin marrë më pak.