sht242020
Suplementet e vajit të peshkut përmirësojnë fertilitetin mashkullor. Studimi në "Jama"
Konsumimi i suplementeve të vajit të peshkut mund të ketë përfitime në fertilitetin mashkullor pasi ka treguar se përmirëson cilësinë e spermës dhe nivelet e hormoneve të lidhura me pjellorinë te burrat e rinj të shëndetshëm. Ky është rezultati i një studimi të botuar në "Jama Network Open", me një mostër prej 1,679 burrash të rinj danezë (19 vjeç). Studimi është bazuar në të dhënat e mbledhura gjatë ekzaminimeve të detyrueshme për kualifikimin për shërbim ushtarak, duke marrë parasysh moshën, konsumin e alkoolit, duhanpirjen, sëmundjet seksualisht të transmetueshme, dietën dhe faktorë të tjerë. Nga këta, 98 (5.8%) adoleshentë raportuan se kishin përdorur suplemente të vajit të peshkut në 3 muajt e fundit dhe 53 (54.1%) raportuan se i kishin marrë ato për 60 ditë ose më shumë.
Duke krahasuar të dhënat e shëndetit riprodhues midis atyre që nuk i kishin marrë dhe atyre që i kishin marrë për të paktën dy muaj, u zbulua se këta të fundit kishin parametra më të mirë: numër i lartë spermatozoidësh, përqindje më e lartë e qelizave normale të spermës, vëllim mesatar i spermës më i lartë dhe madhësi mesatare më e madhe e testikujve. Ata kishin gjithashtu nivele konsiderueshëm më të ulëta të hormoneve stimuluese të folikulit dhe nivele të ulëta të hormoneve luteinizuese, duke treguar një funksion më të mirë të testikujve.
Studimi zbuloi gjithashtu një ndryshim në marrëdhëniet dozë/përgjigje. Ata që kishin marrë suplemente për më shumë se 60 ditë, kishin funksion më të mirë të testikujve sesa ata që i kishin marrë për më pak kohë (<2 muaj): vëllimi i spermës prej 0.64ml vs. 0.38 mL, madhësia e testikullit 1.5 mL vs. 0,8 ml.
"Ne zbuluam se burrat e rinj të shëndetshëm që merrnin integratorë, kishin numër më të lartë spermatozoidesh", tha dr. Tina Kold Jensen nga Spitali Universitar i Kopenhagenit, autore kryesore e studimit. "Kështu, unë do t'u rekomandoja burrave të marrin suplemente nëse nuk kanë një dietë të pasur me peshk. Marrja e këtyre suplementeve nuk është e rrezikshme dhe mund të ketë përfitime për shëndetin kardiovaskular".
Studimi sugjeron që marrja e suplementeve të vajit të peshkut shoqërohet me funksion më të mirë të testikujve, por nuk adreson përqendrimin e acideve yndyrore omega-3 në suplemente. Në këtë pikë, të njëjtët autorë specifikojnë se rezultatet kanë nevojë për konfirmim me prova klinike me përzgjedhje rastësore, më specifike.
Parathënia e studimit, është një përmbledhje sistematike e vitit 2017 që zbuloi se një dietë e shëndetshme e pasur me lëndë ushqyese të caktuara, të tilla si acide yndyrore omega-3, antioksidantë, vitamina (vitaminë D dhe acid folik) dhe pak acide të ngopura e acide yndyrore trans, lidhej me cilësi të mirë të spermës. Në veçanti, me përmirësimin e cilësisë së spermës është lidhur konsumi i peshkut dhe vajit të mëlçisë së peshkut që përmbajnë edhe nutrientë të tjerë thelbësorë, përfshirë acidin retinoik (d.m.th. vitaminën A).